
کراچی، شیعہ علماء کونسل کا پاکستان، فلسطین اور کشمیری شہداء کیلئے چراغاں
شیعہ نیوز (پاکستانی شیعہ خبر رساں ادارہ) شیعہ علماء کونسل پاکستان کی جانب سے عید الفطر کے موقع پر شہدائے پاکستان اور فلسطینی و کشمیری شہداء کی یاد میں نمائش چورنگی پر چراغاں اور تصویری نمائش کا انعقاد کیا گیا، جس مختلف سیاسی و مذہبی جماعتوں کے رہنماؤں نے شرکت کی۔
اس موقع پر اپنے خطاب میں علامہ ناظر عباس تقوی کا کہنا تھا کہ فلسطینی، کشمیری اور بالخصوص شہداء پاکستان کی قربانیاں رائیگاں نہیں جائیں گی، ملکی عوام اپنے مظلوم فلسطینی و کشمیری غیور مسلمانوں کے ساتھ کھڑے ہیں۔
ان کا کہنا تھا کہ اسرائیل ایک غیر آئینی غاصب ریاست ہے اسے ہرگز تسلیم نہیں کیا جائے گا، مسئلہ فلسطین کے حل کیلئے عالمی برادری کر کردار مجرمانہ ہے، کشمیر و فلسطین میں بے گناہ عوام کو جارحیت کا نشانہ بنایا جارہا ہے، عالمی برادری خاموش تماشائی بنی ہوئی ہے۔
یہ خبر بھی پڑھیں ملک بھر میں 8شوال کویوم انہدام جنت البقیع منایا جائے گا
انہوں نے کہا کہ او آئی سی و عرب لیگ صہیونی مظالم پر چپ سادے ہوئے ہیں، چند عرب ممالک نے اسرائیل کو تسلیم کرکے امت مسلمہ کی پیٹ پر خنجر گھونپا، فلسطین فلسطینیوں کی سرزمین ہے، اگر ان حق نہ دیا گیا تو ان خائن ممالک کی بادشاہتوں کو بھی صہیونی گرا دیں گے۔
اس موقع پر دیگر رہنماوں کا کہنا تھا شہدائے پاکستان کو ہم کبھی فراموش نہیں کر سکتے، ان شہداء کی قربانیوں کی بدولت آج وطن عزیز میں امن کا قیام ممکن ہوا، اس لئے آج ہم عید شہداء کے خانوادوں کے ہمراہ منا رہے ہیں تاکہ ان کو اپنے پیاروں کی کمی محسوس نہ ہوسکے۔
چراغاں میں شیعہ علماء کونسل کے مرکزی سیکرٹری جنرل علامہ شبیر میثمی، علامہ حسن ظفر نقوی، علامہ ناظر عباس تقوی، پی ایس پی کے جعفر حسین، جماعت اسلامی کے اسد اللہ بھٹو، جماعت علمائے اسلام کے قاضی احمد نورانی، مفتی فضل الرحمن، فلسطین فاؤنڈیشن کے صابر ابو مریم، علامہ صادق جعفری، رضی حیدر رضوی، ایس ایم نقی، شمس الحسن شمسی سمیت دیگر رہنماؤں اور کارکنان کی بڑی تعداد موجود تھی، جنہوں نے مظلوم شہداء کو خراج عقیدت پیش کرنے کیلئے شمع روشن کی اور ان کی بلندی درجات کیلئے دعائیں کی۔