آزاد و خودمختار فلسطینی ریاست کے قیام کی حمایت غیر متزلزل ہے، سعودی عرب
شیعہ نیوز: سعودی وزارت خارجہ نے صدر ٹرمپ کے متنازع بیان کو مسترد کرتے ہوئے کہا ہے کہ سعودی عرب آزاد اور خودمختار فلسطینی ریاست کے موقف پر قائم ہے۔
رپورٹ کے مطابق امریکی صدر ٹرمپ نے گذشتہ دنوں فلسطینیوں کو ان کے وطن سے نکالنے کے بارے میں متنازع بیان دیا تھا جس میں سعودی عرب کے مبینہ طور پر فلسطینی ریاست کے قیام سے دستبردار ہونے کا تاثر دیا گیا تھا۔
صدر ٹرمپ کے بیان پر ردعمل دیتے ہوئے سعودی وزارت خارجہ نے ایک سرکاری اعلامیہ جاری کیا ہے جس میں واضح کیا گیا ہے کہ ریاض بارہا اس بات پر زور دے چکا ہے کہ آزاد و خودمختار فلسطینی ریاست کے قیام کے بارے میں اس کا مؤقف مضبوط، مستحکم اور غیر متزلزل ہے۔
یہ بھی پڑھیں : شیخ نعیم قاسم پر آسٹریلیا کی جانب سے پابندی پر حزب اللہ کا پر ردعمل
بیان میں مزید کہا گیا کہ ولی عہد محمد بن سلمان نے سعودی مؤقف کو بالکل واضح اور غیر مبہم انداز میں بیان کیا ہے جس کے بعد کسی قسم کی تشریح کی گنجائش نہیں۔
وزارت خارجہ نے اس بات پر بھی زور دیا کہ ہم کسی ایسے منصوبے کو قبول نہیں کریں گے جس میں فلسطینیوں کو ان کے گھروں اور زمینوں سے بےدخل کیا جائے۔
بیان میں اس امر کی بھی تصدیق کی گئی کہ سعودی عرب فلسطینیوں کے حقوق کی خلاف ورزی کرنے والے کسی بھی اقدام، چاہے وہ غیر قانونی یہودی بستیاں ہوں، زمینوں کا الحاق ہو، یا جبری نقل مکانی، سب کو مسترد کرتا ہے۔
اعلامیے کے آخر میں کہا گیا ہے کہ ریاض اپنے مؤقف پر ثابت قدم ہے۔ مشرق وسطی میں حقیقی امن صرف اسی صورت میں ممکن ہے جب فلسطینی عوام کے حقوق تسلیم کیے جائیں۔
