حزب اللہ آپ کو اپنا پشت پناہ سمجھتی ہے، سید حسن نصراللہ کا آیت اللہ رئیسی کو پیغام

شیعہ نیوز (پاکستانی شیعہ خبر رساں ادارہ) صدارتی انتخابات میں کامیابی پر نومنتخب صدر آیت اللہ رئیسی کے نام سیدحسن نصراللہ نے تہنیتی پیغام ارسال کیا ہے۔

سید حسن نصراللہ نے اپنے پیغام میں کہا ہے کہ ميں اس عظیم کامیابی اور تاریخ کے اس حساس موڑ پر صدر ایران کی حیثیت سے آپ کے انتخاب پر مبارکباد پیش کرتا ہوں۔

سید حسن نصراللہ نے اپنے بیان میں صراحت کے ساتھ کہا ہے کہ آپ کی کامیابی نے ملت ایران اور علاقے کی اقوام کے دلوں میں مستقبل اور درپیش چیلنجوں کے مقابلے کے تعلق سے امیدیں پیدا کردی ہیں۔

یہ خبر بھی پڑھیں ایران کے دفاعی اور میزائل نظام کے بارے میں مذاکرات کی کوئی گنجائش نہیں: آیت اللہ رئیسی

سید مقاومت نے تاکید کی کہ آپ کی کامیابی نے روشن مستقبل اور موجود چیلنجوں کے بھرپور مقابلے کے حوالے سے ایرانی قوم سمیت پورے خطے کی اقوام کی امیدوں کو زندہ کر دیا ہے۔

حزب اللہ کے سربراہ نے اپنے اس پیغام میں مزید کہا ہے کہ استقامتی محاذ سے وابستہ جوان اور حریت پسند جارح قوتوں کے مقابلے میں آپ کو اپنے لئے ایک مستحکم قلعہ اور پشت پناہ سمجھتی ہیں۔

فلسطین کی اسلامی مزاحمتی تحریک حماس اور جہاد اسلامی فلسطین نے بھی ایران کے صدارتی انتخابات میں کامیابی پر نومنتخب صدر آیت اللہ رئیسی کے نام اپنے علیحدہ علیحدہ پیغامات میں مبارک باد پیش کی ہے۔ قطر کے امیر، عمان کے سلطان، کویت کے امیر، عراق کے صدر اور وزیراعظم نیز شام کے صدر بشار اسد جیسے علاقے کے سربراہوں نے بھی نومنتخب صدر ابراہیم رئیسی کو مبارکباد پیش کی ہے۔