آج پاکستان کو قائداعظم کا پاکستان بنانے کے تجدید عہد کا دن ہے

شیعہ نیوز (پاکستانی شیعہ خبر رساں ادارہ) بانی پاکستان قائداعظم محمد علی جناحؒ کے 144ویں یومِ ولادت کے موقع پر اپنے ایک بیان میں آئی ایس او کراچی ڈویژن کے صدر محمد عباس نے کہا کہ قائداعظمؒ نے اپنی سیاسی بصیرت اور دور اندیشی کے ساتھ آنے والے وقت کیئلے اتحاد، تنظیم اور یقین محکم جیسے رہنما اصول وضع کر دیے تھے، آج مملکت خداداد جن مسائل میں گھرا ہوا ہے، اسکی ایک وجہ بانی پاکستان کے فرمودات سے روگردانی ہے۔

انہوں نے کہا کہ آج کا پاکستان قائداعظم کے تصورات اور نظریات سے متصادم نظر آتا ہے، قائداعظم پاکستان کو عظیم اسلامی فلاحی ریاست بنانا چاہتے تھے، جس میں ہر خاص و عام اور ہر مسلک و مذہب سے تعلق رکھنے والے کیلئے امن و امان، انصاف، سکون اور بنیادی حقوق کی فراہمی ہو، مگر کرپٹ سیاسی نظام نے عوام سے جینے کا حق بھی چھین لیا۔

محمد عباس نے کہا کہ آج ہمیں پھر سے اسی جذبے کو زندہ کرنے کی ضرورت ہے، جس کی وجہ سے پاکستان معرض وجود میں آیا، تاکہ قائداعظم محمد علی جناحؒ کے خواب کی تکمیل ہو سکے اور پاکستان اقوام عالم میں اپنا لوہا منوا سکے۔

انہوں نے کہا پچیس دسمبر کا دن روح قائد کا شکریہ ادا کرنے کا دن ہے، قائداعظم نے ہمیں پاکستان کا تحفہ دیا، یہ ان کا عظیم احسان ہے۔

انہوں نے کہا کہ ہمیں اپنے قائد سے آج تجدید عہد وفا کرنا ہوگا کہ ہم پاکستان کو عظیم تر بنائیں گے، ہمیں کرپٹ سیاسی نظام کو ختم کرکے موجودہ پاکستان کو قائداعظم کا دیا ہوا پاکستان بنانا ہوگا۔