شہید قاسم سلیمانی کی قبر کے قریب دہشت گردانہ حملہ، شہداء کی تعداد 73 ہوگئی، 170 سے زائد زخمی

شیعہ نیوز: ایران کے جنوب مشرقی شہر کرمان میں دو دہشت گرد دھماکوں میں 73 افراد شہید اور 170 زخمی ہوگئے ہیں، یہ دھماکے شہید جنرل قاسم سلیمانی کی تدفین کے مقام کے قریب ہوئے، جہاں لوگ ان کی چوتھی شہادت کی برسی کے موقع پر جمع تھے۔ ایمبولینسیں جائے وقوعہ پر پہنچ گئی ہیں۔ ارنا کے مطابق پہلا دھماکا جنرل سلیمانی کی قبر سے تقریباً 700 میٹر اور دوسرا دھماکا تقریباً ایک کلومیٹر کے فاصلے پر ہوا۔ تسنیم خبر رساں ادارے نے نامعلوم ذرائع کے حوالے سے بتایا ہے کہ بموں سے بھرے دو سوٹ کیسز جنہیں ریموٹ کنٹرول کے ذریعے اڑا دیا گیا تھا میں دھماکے ہوئے۔ پہلا دھماکہ مقامی وقت کے مطابق 14 بجکر 50 منٹ پر ہوا اور دوسرا 15 منٹ بعد ہوا۔ حکام کا کہنا ہے کہ تمام زخمیوں کو اسپتالوں میں منتقل کر دیا گیا ہے اور صورتحال قابو میں ہے۔