شام اور لبنان کے جنوبی علاقوں پر اسرائیلی فوج کے فضائی حملے

شیعہ نیوز: خبر رساں ذرائع نے جمعرات کی صبح شام کے دارالحکومت دمشق کے جنوب میں اسرائیلی فوج کے فضائی حملے کی اطلاع دی ہے۔

المیادین کے نامہ نگار کے مطابق، ابتدائی اطلاعات میں جنوبی دمشق میں واقع علاقے "سیدہ زینب” کے قریب دھماکے کی آواز سنی گئی۔

اس سلسلے میں شام کی سرکاری خبر رساں ایجنسی سنا ایک فوجی ذریعے کے حوالے سے بتایا کہ بدھ کی رات تقریباً 23:40 پر صیہونی دشمن نے مقبوضہ گولان کے اطراف میں جنوبی علاقے پر فضائی حملہ کیا اور متعدد علاقوں کو نشانہ بنایا۔

یہ بھی پڑھیں : صہیونی جیلوں میں فلسطینی قیدیوں پر تشدد، عالمی برادری خاموش تماشائی

شام کے ایئر ڈیفنس نے دشمن کے حملوں کا مقابلہ کیا اور ان میں سے متعدد کو مار گرایا جبکہ اس جارحیت کے نتیجے میں 2 افراد ہلاک اور ایک فوجی زخمی ہوگیا اور عمارتوں کو بھی نقصان پہنچا۔

دوسری جانب بدھ کی رات جنوبی لبنان کے شہر النبطیہ کے ایک علاقے پر بھی اسرائیلی فوج کے فضائی حملے کی اطلاعات ہیں۔

اس حملے میں 5 افراد زخمی ہوئے اور آس پاس کی عمارتوں کو نقصان پہنچا ہے۔

اس کے علاوہ اسرائیلی فوج کے توپ خانے نے جنوبی لبنان میں واقع الناقورہ کے ارد گرد اللبونہ کے علاقے کو بھی نشانہ بنایا۔