غزہ میں اسپتال پر حملہ ناجائز اور غیر قانونی ہے، کینیڈین وزیراعظم کی شدید مذمت

شیعہ نیوز:کینیڈین وزیراعظم جسٹن ٹروڈو نے اسرائیل کی جانب سے غزہ میں اسپتال پر ہونے والے تازہ حملے پر مذمتی بیان جاری کیا ہے۔ اسرائیل کی جانب سے غزہ میں وحشیانہ بمباری جاری ہے، صیہونی افواج کے اسپتال پر ہونے والے تازہ حملے میں 800 سے زائد فلسطینی شہید ہوگئے۔ اسرائیلی طیاروں نے اسپتال کو نشانہ بنایا، جس میں طبی عملہ، مریض اور پناہ لیے ہوئے عام شہری شہید ہوئے۔ فلسطینی وزارت صحت کے مطابق اسرائیلی طیاروں نے وسطی غزہ میں موجود اسپتال کو نشانہ بنایا، جس میں 600 سے زائد افراد زخمی بھی ہوئے ہیں، متعدد افراد کی حالت تشویش ناک ہے اور اموات میں مزید اضافے کا خدشہ ہے۔ غزہ میں اسپتال پر اسرائیلی حملے پر بیان جاری کرتے ہوئے کینیڈا کے وزیراعظم جسٹن ٹروڈو نے کہا کہ "غزہ سے آنے والی خبریں بہت تباہ کن ہیں، اسپتال پر حملہ بہت خوفناک اور ناقابل قبول ہے۔” کینیڈین وزیراعظم کا کہنا تھا کہ غزہ میں اسپتال پر حملہ ناجائز اور غیر قانونی ہے۔

اس کے علاوہ ترک صدر رجب طیب اردوان نے بھی مذمتی بیان جاری کرتے ہوئے کہا ہے کہ غزہ کے اسپتال پر اسرائیلی بمباری کی شدید الفاظ میں مذمت کرتے ہیں، غزہ میں جاری وحشیانہ مظالم فوری روکے جائیں۔ ادھر ایران کی جانب سے غزہ پر اسرائیلی بمباری کی مذمت کرتے ہوئے کہا گیا کہ غزہ کے اسپتال پر اسرائیلی حملہ وحشیانہ جنگی جرم ہے۔ دوسری جانب اردن، قطر، عالمی ادارہ صحت اور عرب لیگ نے بھی غزہ کے اسپتال پر اسرائیلی بمباری کی شدید الفاظ میں مذمت کی ہے۔ عرب لیگ کی جانب سے جاری بیان میں کہا گیا کہ غزہ میں جاری المیے کو فوری روکنا ہوگا۔ واضح رہے کہ غزہ پر اسرائیل کے حملوں میں شہید فلسطینیوں کی تعداد 3500 سے زیادہ ہوگئی ہے۔ فسلطینی وزارت صحت کے مطابق غزہ میں اسرائیلی حملوں سے 12 ہزار 500 افراد زخمی ہوئے ہیں، شہید ہونے والوں میں 1000 سے زائد بچے اور ہزار سے زائد خواتین شامل ہیں۔