
بانی پاکستان قائداعظم محمد علی جناح کا یوم پیدائش آج منایا جا رہا ہے
شیعہ نیوز: بانی پاکستان قائداعظم محمد علی جناح کا ملک بھر میں 147واں یوم پیدائش منایا جا رہا ہے۔ ملک بھر میں آج عام تعطیل ہے۔ کراچی میں بانی پاکستان کے مزار پرگارڈز کی تبدیلی کی پر وقار تقریب کا انعقاد ہوا۔
دن کا آغاز نماز فجر کے بعد خصوصی دعاؤں سے ہوا۔ جس میں ملک کی ترقی اور خوشحالی اور امن و سلامتی کے لیے دعائیں کی گئیں۔
قائد اعظم محمد علی جناحؒ کی روح کے ایصال ثواب کےلئے فاتحہ خوانی کا سلسلہ بھی جاری ہے۔
مزار قائد پر منعقد ہونے والی تقریب میں پی ایم اے کاکول کے کیڈٹس نے پاک فضائیہ کی جگہ گارڈز کے فرائض سنبھال لیے۔ کمانڈنٹ پاکستان ملٹری اکیڈمی میجر جنرل اختر نواز ستی نے پریڈ کا معائنہ کیا۔
اس سےقبل پاک فضائیہ کےکیڈٹس مزارپرگارڈکےفرائض انجام دےرہےتھے۔
یہ بھی پڑھیں : غزہ: 4 دن میں 48 صہیونی فوجی جہنم واصل، 35 فوجی گاڑیاں تباہ
برصغیر کے مسلمانوں کو پاکستان کی صورت میں ایک آزاد وطن دینے والے بانی پاکستان قائداعظم محمد علی جناح نے 25 دسمبر 1876 کو کراچی کے وزیر مینشن میں آنکھ کھولی، تو کون جانتا تھا کہ یہ بچہ عظیم رہنما بن کر برصغیر کے مسلمانوں کی کشتی پار لگانے میں اہم کردار ادا کرے گا۔
انہوں نے ابتدائی تعلیم سندھ مدرستہ الاسلام میں حاصل کی، جبکہ میٹرک کا امتحان جامعہ بمبئی سے پاس کیا۔ بعد میں اعلیٰ تعلیم کیلئے لندن روانہ ہو گئے۔
1895 میں انہوں نے لندن سے قانون کی ڈگری حاصل کرلی اور بمبئی واپس آ کر باقاعدہ طور پر وکالت کا آغاز کیا۔ 1896 میں محمد علی جناح نے سیاسی زندگی کا آغاز کرتے ہوئے انڈین نیشنل کانگریس میں باقاعدہ شمولیت اختیار کر لی، لیکن کچھ عرصے بعد ہی انہیں احساس ہوا کہ کانگریس صرف ہندوؤں کی نمائندہ جماعت ہے۔
1913 میں انہوں نے آل انڈیا مسلم لیگ میں شمولیت اختیار کی اور علیحدہ وطن کی باقاعدہ تحریک کا آغاز کیا۔
بالآخر ان کی جدوجہد رنگ لائی اور 14 اگست 1947 کو برصغیر کے مسلمانوں کا علیحدہ وطن کا خواب پورا ہوا، جس کا نام پاکستان رکھا گیا۔
بانی پاکستان قائداعظم محمد علی جناح کئی بیماریوں سے لڑتے لڑتے بالآخر 11 ستمبر 1948 کو خالق حقیقی سے جا ملے۔