صدر ابراہیم رئیسی کا انتقال امت مسلمہ کیلئے بہت بڑا نقصان ہے، خرم نواز گنڈاپور

شیعہ نیوز: تحریک منہاج القرآن کے ناظم اعلیٰ خرم نواز گنڈاپور نے وفد کے ہمراہ لاہور میں قونصل جنرل اسلامی جمہوریہ ایران لاہور آغاء مہران مواحدفر کے نائب، ڈپٹی قونصل جنرل ایران آقائے علی اصغر موغیری سے ملاقات کی۔ خرم نواز گنڈاپور نے ڈپٹی قونصل جنرل ایران سے المناک ہیلی کاپٹر حادثے میں ایرانی صدر ابراہیم رئیسی اور ان کے رفقا کے انتقال پر اظہار افسوس کیا۔ اس موقع پرڈائریکٹر خانہ فرہنگ ڈاکٹر اصغر مسعودی، سابق ڈائریکٹر آقائے جعفر روناس بھی موجود تھے۔

وفد میں ڈائریکٹر ڈپلومیٹک ریلیشنز منہاج القرآن انٹرنیشنل سہیل احمد رضا، اورنگزیب رضا خان اور حفیظ الرحمن خان شامل تھے۔ خرم نواز گنڈاپور نے مہمانوں کی کتاب میں اپنے تاثرات بھی درج کئے۔ خرم نواز گنڈاپور نے کہا کہ مشکل اور دکھ کی اس گھڑی میں ہر پاکستانی ایرانی حکومت اور عوام کیساتھ کھڑا ہے۔ صدر ابراہیم رئیسی کا انتقال نہ صرف ایران بلکہ پوری امت مسلمہ کیلئے ایک بہت بڑا نقصان ہے۔ برادر اسلامی ملک ایران کے عوام کیساتھ دکھ اور غم کی اس گھڑی میں برابر شریک ہیں۔