نیتن یاہو کے خلاف عدم اعتماد کے لئے کنیسٹ میں ووٹنگ ہوگی
شیعہ نیوز: صہیونی عوام کے شدید مظاہروں اور غزہ کے خلاف جنگ میں کابینہ کی ناکامی کے بعد کنیسٹ میں نیتن یاہو کو معزول اور کابینہ کے خلاف عدم اعتماد کے لئے ووٹنگ کی جائے گی۔
عبرانی ذرائع ابلاغ نے کہا ہے کہ غزہ کے خلاف جنگ شروع ہونے کے بعد پہلی مرتبہ صہیونی وزیراعظم اور کابینہ کے خلاف پارلیمنٹ میں عدم اعتماد کی تحریک پر ووٹنگ کی جائے گی۔
یہ بھی پڑھیں : اسرائیل کے خلاف دوسرے قانونی فورمز میں بھی شکایت کریں گے، جنوبی افریقی رہنما
ذرائع کے مطابق اپوزیشن لیڈر لاپیڈ کی طرف سے وزیراعظم نیتن یاہو کے خلاف عدم اعتماد کی تحریک اسرائیلی پارلیمنٹ کنیسٹ میں پیش کی جائے گی جس کے بعد پارلیمنٹ کے اراکین ووٹنگ میں حصہ لیں گے۔
عبرانی ذرائع ابلاغ نے انکشاف کیا ہے کہ حکومت حامی جماعت نے آئندہ بجٹ کے بارے میں تحفظات کی وجہ سے حکومت کے خلاف عدم اعتماد کا ووٹ دینے کا فیصلہ کیا ہے۔
صلح اور امن کے داعی اتحاد کی جانب سے بھی اپوزیشن لیڈر کو یقین دہانی کرائی گئی ہے کہ تحریک پیش ہونے کی صورت میں نیتن یاہو کے خلاف عدم اعتماد کا ووٹ دیا جائے گا۔
اتحاد میں شامل جماعتوں نے کہا ہے کہ نیتن یاہو حکومت حماس کے خلاف صلح کے بجائے اپنے سیاسی مفادات کی خاطر غزہ میں فلسطینیوں کا قتل عام کرنا چاہتی ہے۔
