لاہور ہائیکورٹ نے عام انتخابات بیورو کریسی سے کرانے کا نوٹیفکیشن معطل کر دیا

شیعہ نیوز: لاہور ہائی کورٹ نے عام انتخابات بیورو کریسی سے کروانے کا الیکشن کمیشن آف پاکستان کی جانب سے جاری کردہ نوٹیفکیشن معطل کر دیا۔ لاہور ہائی کورٹ کے جسٹس علی باقر نجفی نے تحریک انصاف کی درخواست پر محفوظ فیصلہ سنایا اور پنجاب میں انتخابات ایگزیکٹو سے کروانے کیخلاف درخواستوں پر لارجر بینچ تشکیل دینے کی سفارش کرتے ہوئے فائل چیف جسٹس لاہور ہائیکورٹ کو ارسال کر دی۔ فیصلے میں کہا گیا کہ الیکشن کرانے پر قوم کے اربوں روپے لگتے ہیں اگر بڑی جماعتیں الیکشن نتائج تسلیم نہ کریں تو قوم کا پیسہ ضائع ہوگا، الیکشن کمیشن کو فری اینڈ فیئر الیکشن کرانے ہیں، شفاف انتخابات کو حقیقت میں بدلنے کیلئے امیدواروں اور ووٹرز کو یکساں مواقع فراہم کرنے ہیں۔

جسٹس علی باقر نجفی نے فیصلے میں لکھا کہ موجودہ صورتحال میں جنرل الیکشن سے مطلوبہ نتائج حاصل نہیں ہوسکتے، جس سے جمہوریت کا مستقبل کمزور ہوسکتا ہے، درخواست میں قومی ایشو سے متعلق نشاندہی کی گئی، لہٰذا لارجر بینچ کیلئے فائل چیف جسٹس کو بھجوائی جاتی ہے۔ دیگر ذرائع کے مطابق لاہور ہائیکورٹ نے 8 فروری کے عام انتخابات ایگزیکٹو سے کروانے کا الیکشن کمیشن کا نوٹیفکیشن معطل کر دیا ہے۔ لاہور ہائیکورٹ کے جسٹس علی باقر نجفی نے پی ٹی آئی کی درخواست پر محفوظ فیصلہ سنا دیا ہے۔ جسٹس علی باقر نجفی نے انتخابات ضلعی انتظامیہ سے کروانے کے فیصلے کے خلاف درخواستوں پر لاہور ہائیکورٹ کا لارجر بینچ تشکیل دینے کی سفارش کی ہے۔جسٹس علی باقر نجفی نے فائل چیف جسٹس لاہور ہائیکورٹ کو ارسال کر دی۔ الیکشن ضلعی انتظامیہ سے کروانے کے فیصلے کو پی ٹی آئی نے چیلنج کیا تھا۔