جموں وکشمیر میں علم شریف کے جلوسوں کا سلسلہ جاری

شیعہ نیوز: جموں و کشمیر انجمن شرعی شیعیان کے اہتمام سے وادی کشمیر کے طول و عرض میں علم شریف کے جلوسوں کا سلسلہ جاری رہا۔ جن مقامات پر علم شریف کے جلوس برآمد کئے گئے ان میں ہانجک بمنہ، لاویپورہ گنڈ حسی بٹ، پازلپورہ شالیمار، لال بازار، عشائی باغ سعدہ کدل، نیوکالونی جڈی بل، مدون حاجن، مرتضیٰ آباد اندرکوٹ وغیرہ شامل ہیں۔ رپورٹ کے مطابق لاویپورہ گنڈ حسی بٹ میں علم شریف کا ایک پُروقار جلوس برآمد کیا گیا۔ جس میں انجمن شرعی شیعیان کے نائب صدر مولانا آغا سید مجتبیٰ عباس الموسوی الصفوی نے شرکت کی۔ آغا مجتبیٰ عباس نے جلوس علم شریف میں شامل عزاداروں سے خطاب کر کے فلسفہ شہادت عظمیٰ کی وضاحت کی اور معرکہ کربلا کے اہداف و مقاصد بیان کئے۔ انہوں نے انتظامیہ سے 8 محرم الحرام اور 10 محرم الحرام کے مرکزی جلوسوں پر گزشتہ 34 برسوں سے عائد غیر آئینی پابندی ختم کرنے کا مطالبہ دہرایا ہے۔