ایران اور سعودیہ کے درمیان سفارتی تعلقات کی بحالی وقت کی ضرورت اور امت مسلمہ کے لئے خوش آئند ہے، علامہ نادر علوی
شیعہ نیوز:مجلس علمائے شیعہ جنوبی پنجاب کے صدر، ممبر متحدہ علماء بورڈ پنجاب و پرنسپل جامعہ شہید مطہری علامہ قاضی نادر حسین علوی نے کہا ہے کہ ایران اور سعودی عرب کے درمیان اختلافات کے خاتمے پر خطے پر خوشگوار اثرات مرتب ہوں گے، اسلام دشمن طاقتوں کی امت کو تقسیم کرنے کی سازش کو آپس کے اتحاد سے ناکام بنانا وقت کی اشد ضرورت ہے، علامہ قاضی نادر حسین علوی نے سعودی عرب اور ایران میں سفارتی تعلقات کی بحالی پر اپنے بیان میں کہا کہ یہ دونوں ممالک پاکستان کے دوست اور برادر ملک ہیں ان کے آپس کے اختلافات سے جہاں دنیا کا ہر مسلمان پریشان تھا وہاں وطن عزیز میں منفی اثرات مرتب ہو رہے تھے علاوہ ازیں امت مسلمہ میں انتشار و افتراق کی فضا بڑھ رہی تھی، سفارتی تعلقات کی بحالی سے مسلمانوں کی صفوں میں انتشار و افتراق پھیلانے والے سازش کار عناصر اور دشمن قوتیں مایوس ہوئیں اور مسلمانوں کی صفوں میں خوشی کی لہر دوڑ گئی۔
علامہ قاضی نادر علوی نے کہا ان دو ممالک میں دوستانہ روابط کی بحالی سے پورے خطے میں امن و استحکام کی فضا پیدا ہوگی، عالمی سامراجی اور شیطانی طاقتوں کی ہمیشہ یہ سازشیں رہی ہیں کہ مسلمانوں کو آپس میں لڑا کر ان کو کمزور کریں اور ان پر حکمرانی کریں، آج کے دور میں اسلامی ممالک کو ہوشیاری اور بیداری کی شدید ضرورت ہے تاکہ مخصوص عناصر کے جھانسے میں آکرمسلمان تقسیم در تقسیم نہ ہوں بلکہ اپنی صفوں میں اتحاد و وحدت کی مضبوط فضا پیدا کریں تاکہ امت سربلند اور دشمن ناکام و نامراد ہو۔
