امت کی اصلاح کیلئے اسوہ حسینی اپنانے کی ضرورت ہے، علامہ شبیر میثمی

شیعہ نیوز: قرآن سینٹر ڈیفنس سوسائٹی کراچی میں دین محمدی کے عنوان سے جاری عشرہ محرم الحرام کی تیسری مجلس عزا سے خطاب کرتے ہوئے معروف عالم دین علامہ ڈاکٹر شبیر حسن میثمی نے کہا کہ مسلم اقوام میں گوناں مشکلات کی وجہ سے انحطاط کا عمل مزید تیز ہوچکا ہے جس کی وجہ سے اسلام دشمن طاقتیں آئے روز کسی نہ کسی اسلامی تعلیم کو نشانہ بناکر اسلام کے خلاف پروپیگنڈے میں مصروف ہیں، ہم اگر اپنی اصلاح کرلیں تو امت کی بہت سی مشکلات حل ہوسکتی ہیں۔ علامہ شبیرحسن میثمی نے کہا کہ امت کی اصلاح کے لیے اسوہ نبوی اور اسوہ حسینی پر عمل پیرا ہونے کی ضرورت ہے کیونکہ یہی وہ حقیقی راستہ ہے جسے اپنا کر ہم اپنی اصلاح بھی کرسکتے ہیں اور پوری دنیا کو صبر و برداشت اور اخوت و بھائی چارے کا پیغام بھی دے سکتے ہیں۔