اقوامِ متحدہ کا اسرائیل سے جنگ روکنے اور غزہ تک امداد کی بلا رکاوٹ فراہمی کا مطالبہ

شیعہ نیوز: اقوامِ متحدہ نے قابض اسرائیل سے مطالبہ کیا ہے کہ وہ غزہ پر جاری جنگ کو فوری طور پر بند کرے اور متاثرہ علاقے تک امدادی سامان کی بلا رکاوٹ رسائی کو یقینی بنائے۔

اقوامِ متحدہ کے سیکریٹری جنرل انتونیو گوتریش نے کہا کہ "ہم غزہ میں فوری جنگ بندی کا مطالبہ کرتے ہیں تاکہ دو ریاستی حل کی طرف ایک ناقابلِ واپسی راستہ ہموار کیا جا سکے”۔

انہوں نے مزید کہا کہ "انسانی امداد کو غزہ تک پہنچنے سے روکنا کسی صورت قبول نہیں۔ اس تک رسائی کو ہر قیمت پر یقینی بنایا جانا چاہیے”۔

یہ بھی پڑھیں : امریکی صدر ٹرمپ کے دورہ ترکی میں روسی صدر رکاوٹ کا باعث بن گئے؟

اقوامِ متحدہ کی جانب سے جاری ایک اور بیان میں، سیکریٹری جنرل کے ترجمان اسٹیفان ڈوجارک نے کہا کہ اقوامِ متحدہ اور قابض اسرائیل کے درمیان سفارتی رابطے مسلسل جاری ہیں، جن کے ذریعے غزہ پر مسلط محاصرہ ختم کرنے اور امداد کی فوری فراہمی کے لیے دباؤ ڈالا جا رہا ہے۔

انہوں نے واضح کیا کہ "ہر انسان کو باوقار زندگی گزارنے کا حق حاصل ہے، چاہے وہ کہیں بھی ہو”۔

ڈوجارک نے مطالبہ کیا کہ غزہ میں فوری جنگ بندی کا اعلان کیا جائے تاکہ اقوامِ متحدہ نہایت ضروری امدادی سامان اور خوراک فوری طور پر متاثرہ فلسطینیوں تک پہنچا سکے۔

انہوں نے کہاکہ "ہم غزہ کی صورت حال کو خوف اور شدید تشویش کی نگاہ سے دیکھ رہے ہیں”۔

سات اکتوبر 2023ء سے اب تک غزہ میں شہدا کی تعداد 52,908 ہو چکی ہے جبکہ 119,721 فلسطینی زخمی ہوئے ہیں، جن میں بھی زیادہ تر خواتین اور بچے شامل ہیں۔