ٹرمپ کی ٹیرف جنگ کے خلاف فوری اقدام کی ضرورت ہے، جرمنی

شیعہ نیوز: جرمنی کے سینیئر سیاستداں اور چانسلر کے عہدے کے امیدوار فیڈرش مرٹز نے جرمنی کی اسٹاک مارکیٹ اور بانڈز کی شدید گراوٹ کے بعد، کہا ہے کہ ٹرمپ کی ٹیرف جنگ کے خلاف فوری اقدام کی ضرورت ہے تا کہ جرمنی، اقتصادی دوڑ میں پیچھے نہ رہ جائے۔

انہوں نے کہا ہے کہ حالات مزید بدتر بھی ہوسکتے ہیں لہذا بین الاقوامی سطح پر معاشی دوڑ میں جرمنی کے پیچھے نہ رہ جانے کے لیے اپنی صورت حال کو بحال کرنا ہوگا۔

انہوں نے کہا کہ فی الحال اس موضوع کو نئی اتحادی حکومت کی تشکیل کا محور ہونا چاہیے۔

یہ بھی پڑھیں : حماس کا مغربی کنارے میں آباد کاروں کے حملوں کا مقابلہ کرنے کے لیے مزاحمت بڑھانے پر زور

قابل ذکر ہے کہ امریکی صدر کی جانب سے دنیا کے تمام ممالک پر کسٹم ڈیوٹی بڑھانے کے بعد، دنیا بھر کی حصص مارکیٹوں میں خوفناک انداز میں گراوٹ آئی ہے۔

بتایا جا رہا ہے کہ کساد بازاری کا خطرہ بہت زیادہ بڑھ گیا ہے جس کے نتیجے میں امریکہ کا فیڈرل ریزرو مئی کے مہینے میں شرح سود میں کمی لانے کا اعلان کرسکتا ہے۔

واضح رہے کہ ٹرمپ نے یورپی یونین کے رکن ممالک کے اسٹیل، ایلومینیم اور گاڑیوں کی درآمدات پر 25 فیصد درآمداتی ڈیوٹی بڑھادی ہے جس سے جرمنی سمیت پورے یورپ میں اقتصادی کساد بازاری میں شدت آسکتی ہے۔