ہم پوری دنیا کے شیعوں کے حالات سے باخبر ہیں، شیخ علی نجفی

شیعہ نیوز: مرجع مسلمین و جہانِ تشیع حضرت آیۃ اللہ العظمیٰ الحاج حافظ بشیر حسین نجفی دام ظلہ الوارف کے فرزند اور انوار نجفیہ فاؤنڈیشن کے سربراہ حجۃ الاسلام شیخ علی نجفی نے مرکزی دفتر نجف اشرف میں زائرین کرام کے وفد سے خطاب کرتے ہوئے کہا ہے کہ ہم پوری دنیا کے شیعوں کے حالات سے باخبر ہیں اور ان پر نظر رکھے ہوئے ہیں، ہم شیعوں کو حضرت امام زمانہ عج کی اطاعت کے پرچم تَلے ایک اور متحد دیکھنا چاہتے ہیں۔

ہم مولا علی علیہ السلام کے جوار میں مولا علی علیہ السلام کے شیعوں کے خادم ہیں اور یہی ہمارا تعارف ہے، مومنین دنیا کے جس کونے میں بھی ہوں ان کی خدمت ہمارے لئے شرف ہے اور مرجع عالی قدر دام ظلہ الوارف کہ جنہوں نے دو مرتبہ قاتلانہ حملوں کا سامنا کیا ہے ہمیشہ فرماتے ہیں کہ ان کا وجود ان کی زندگی مولا علی علیہ السلام کے شیعوں کی خدمت کے لئے ہی ہے۔

یہ بھی پڑھیں: اسرائیل نے آئرلینڈ میں اپنا سفارت خانہ بند کر دیا

ان کا کہنا تھا کہ حوزہ علمیہ نجف اشرف اور دنیا کے دیگر حوزات علمیہ کی نگرانی اور خدمت ہمارے لئے عزت اور شرف کی بات ہے، دنیا میں مومنین کرام کے ساتھ رابطے میں ہیں اور مرکزی دفتر سے مختلف زبانوں میں رابطے مسلسل بحال ہیں، ہم شیعوں کے حالات پر مسلسل نظر رکھے ہوئے ہیں خاص کر ان کے معاشرتی، معاشی ،تعلیمی امور اور ان کو درپیش مسائل پر گہری نظر رکھے ہوئے ہیں اور وقتا ًفوقتاً اپنے بیانات اور رائے سے مومنین کرام کو باخبر رکھتے ہیں، اگر مومنین کرام کو کسی قسم کی مشکلات کا سامنا ہوتا ہے اور اس بات کی ضرورت ہوتی ہے کہ مرجعیت دخل دے تو ہم اپنے رائے کا اعلانیہ اظہار بھی کرتے ہیں اور متعلقہ ذمہ داروں سے رابطہ کرکے بتوفیق الٰہی مومنین کی خدمت کو یقینی بنانے کی کوشش کرتے ہیں۔

انہوں نے کہا کہ دنیا کے اکثر ممالک سے ہمارے روابط اچھے ہیں، لیکن یہ بات واضح رہے کہ کسی بھی حکومت یا ادارے سے ہمارے رابطے کا مقصد صرف اور صرف وہاں کے مومنین کی حتی المقدور خدمت ہے۔ انہوں نے پوری دنیا کے مومنین کے نام اپنے پیغام میں کہا ہے کہ یہ دفتر آپ سب کا دفتر ہے، یہ سارے شیعوں کا گھر ہے، آپ کسی بھی ملک کسی زبان کسی قومیت سے تعلق رکھتے ہیں یا آپ کی وابستگی کن سے ہے ہم ان خصوصیتوں کی قدر کرتے ہیں، ہم شیعوں کو حضرت امام زمانہ عج کی اطاعت کے پرچم تلے ایک اور متحد دیکھنا چاہتے ہیں اور آپ کی خدمت کو اپنے لئے شرف سمجھتے ہیں۔