شہید ہنیہ کے انتقام کو ہم اپنا فرض سمجھتے ہیں، آیت اللہ سید علی خامنہ ای
شیعہ نیوز: حماس کے سیاسی دفتر کے سربراہ عظیم مجاہد اسماعیل ہنیہ کی شہادت کے بعد رہبر انقلاب اسلامی آیت اللہ العظمیٰ سید علی خامنہ ای نے ایک پیغام جاری کیا ہے۔
رہبر انقلاب اسلامی نے اپنے اس پیغام میں اس عظیم و بہادر مجاہد رہنما کی شہادت کی اسلامی امت، مزاحمتی محاذ اور فلسطین کی قابل فخر قوم کو تعزیت پیش کی اور زور دیا ہے کہ "مجرم و دہشت گرد صیہونی حکومت نے، ہمارے پیارے مہمان کو ہمارے گھر میں شہید کر دیا اور ہمیں سوگوار کیا لیکن اس نے اپنے لئے سخت انتقام کے بھی حالات فراہم کر ليے اور شہید ہنیہ کے انتقام کو ہم اپنا فرض سمجھتے ہيں ”
یہ بھی پڑھیں : ایران و فلسطین کی قوموں کے تعلقات پہلے سے زیادہ مضبوط ہوں گے ، صدر ایران کا پیغام
رہبر انقلاب کے پیغام کا متن اس طرح ہے :
بسم اللہ الرحمن الرحیم
انا للہ و انا الیہ راجعون
پیاری ایرانی قوم!
فلسطین کے شجاع و بہادر رہنما جناب اسماعیل ہنیہ گزشتہ شب صبح کے وقت اللہ کو پیارے ہو گئے اور عظیم مزاحمتی محاذ سوگوار ہو گیا۔مجرم و دہشت گرد صیہونی حکومت نے، ہمارے پیارے مہمان کو ہمارے گھر میں شہید کر دیا اور ہمیں سوگوار کیا لیکن اس نے اپنے لئے سخت انتقام کے بھی حالات فراہم کر ليے ۔
شہید اسماعیل ہنیہ برسوں سے با عزت جہد و جہد کے میدانوں میں اپنی قیمتی جان ہتھیلی پر لے کر چلتے تھے، وہ شہادت کے لئے تیار تھے اور انہوں نے اپنے فرزندوں اور عزیزوں کو اس راہ میں قربان بھی کیا تھا ۔ انہيں اللہ کی راہ اور اس کے بندوں کی نجات کے لئے شہید ہونے میں کوئی تذبذب نہيں تھا لیکن ہم اس تلخ و سخت سانحے کے بعد کہ جو اسلامی جمہوریہ کی سرحد کے اندر ہوا ، انتقام کو اپنا فریضہ سمجھتے ہيں۔
میں اسلامی امت، مزاحمتی محاذ، فلسطین کی سرفراز و شجاع قوم اور خاص طور پر شہید ہنیہ اور ان کے ساتھ شہید ہونے والے ان کے ایک ساتھی کے لواحقین اور اہل خانہ کو تعزیت پیش کرتا ہوں اور خداوند عالم سے ان کے علو درجات کی دعا کرتا ہوں ۔
سید علی خامنہ ای
