ہماری کوئی ڈیل نہیں ہوئی، نواز شریف اقتدار میں آگئے تو بیانیہ مفاہمت کا ہوگا، اسحاق ڈار
شیعہ نیوز: مسلم لیگ نون کے رہنماء اور سابق وزیر خزانہ اسحاق ڈار کا کہنا ہے کہ نواز شریف کے خلاف پاناما کا ڈرامہ رچایا گیا، ہماری کوئی ڈیل نہیں ہوئی، ہم ڈیل پر یقین نہیں رکھتے۔ ایک نجی ٹی وی چینل کو انٹرویو دیتے ہوئے اسحاق ڈار نے کہا کہ نواز شریف نے کہا ہے کہ وہ انتقام کی سیاست نہیں کریں گے، وہ اقتدار میں آگئے تو بیانیہ مفاہمت کا ہی ہوگا، پی ڈی ایم حکومت کا مقصد ملک کو ڈیفالٹ ہونے سے بچانا تھا۔ انہوں نے کہا کہ بے نظیر بھٹو جب 2007ء میں آئیں تو ان کی اپیل ہائی کورٹ میں تھیں، انہوں نے عدالت میں حفاظتی ضمانت کے لیے نہیں حتمی ضمانت کے لیے درخواست دی تھی۔
اسحاق ڈار کا کہنا تھا کہ پیپلزپارٹی کے ساتھ اچھا ورکنگ ریلیشن شپ رہا ہے، خورشید شاہ یا دیگر لوگ جو کہہ رہے ہیں کہ ان کی باتوں کا جواب نہیں دوں گا، میری ذاتی خواہش ہے کہ تمام اہم سیاسی جماعتوں کو مل کر حکومت بنانی چاہیئے، ہمیں پاکستان کو جی 20 میں شامل کرنا ہے۔ انہوں نے مزید کہا کہ نواز شریف اور آصف زرداری کی آنے والے وقت میں ملاقات ہوگی، مسلم لیگ نون کے قائد اس وقت اپنے قانونی معاملات میں مصروف ہیں۔ اسحاق ڈار کا کہنا تھا کہ نواز شریف الیکشن کی تاریخ کیسے دے سکتے ہیں؟ وہ کس حیثیت میں الیکشن کی تاریخ دیں؟ جتنی جلدی الیکشن ہوں، یہ ہمارے لیے بہتر ہے۔
سابق وزیر خزانہ نے کہا کہ الیکشن کمیشن کو صاف اور شفاف انتخابات کروانے ہیں، کسی کا نواز شریف سے گلا نہیں بنتا کہ ابھی تک الیکشن کی تاریخ کی بات نہیں کی۔ مسلم لیگ نون کے قائد کے استقبال کے حوالے سے بات کرتے ہوئے اسحاق ڈار نے کہا کہ شاہد خاقان عباسی شاید ذاتی مجبوری کی وجہ سے نواز شریف کے استقبال کے لیے نہیں آسکے، شاہد خاقان پارٹی کے سینیئر نائب صدر ہیں، انہوں نے استعفیٰ نہیں دیا۔ اسحاق ڈار نے مزید کہا کہ اس وقت ڈالر کی حقیقی قدر 240 سے 250 روپے کے درمیان ہونی چاہیئے۔
