کشمیر و فلسطین کے تنازعات کے حل کے بغیر عالمی امن ممکن نہیں، ایاز صادق

شیعہ نیوز: اسپیکر قومی اسمبلی سردار ایاز صادق نے کہا ہے کہ کشمیر اور فلسطین کے دیرینہ تنازعات کے حل کے بغیر پائیدار عالمی امن کا قیام ممکن نہیں۔

ذرائع کے مطابق ایاز صادق نے برطانیہ کے ایک پارلیمانی وفد سے ملاقات کے دوران مقبوضہ جموں و کشمیر اور فلسطین میں انسانی حقوق کی خلاف ورزیوں پر گہری تشویش کا اظہار کرتے ہوئے کہا کہ علاقائی استحکام اور امن کے لیے ان مسائل کو حل کرنا بہت ضروری ہے۔

یہ بھی پڑھیں: علامہ شیخ حسن جعفری کا لینڈ ریفارمز بل پر آل پارٹیز کانفرنس بلانے کا اعلان

سپیکر قومی اسمبلی سردار ایاز صادق  نے کہا کہ پاکستان نے دہشت گردی کے خلاف عالمی امن کے لیے بے پناہ قربانیاں دی ہیں اور اس نے ہمیشہ علاقائی امن کے لیے بھی کوششیں کی ہیں۔

سردار ایاز صادق نے خطے میں امن و استحکام کے فروغ کے لیے پاکستان کے غیر متزلزل عزم کا اعادہ کیا۔ انہوں نے برطانیہ کے ساتھ پاکستان کے تاریخی اور دیرینہ تعلقات کا ذکر کیا اور کہا کہ پارلیمانی اور اقتصادی تعاون کو مضبوط بنانے سے دوطرفہ تعلقات کو مزید فروغ ملے گا۔

یہ بھی پڑھیں: بحیرہ احمر میں یمنی فوج کا اسرائیل سے منسلک کشتی پر حملہ

اسپیکر ایاز صادق سے ملاقات کرنے والے برطانیہ کے پارلیمانی وفد میں برطانیہ کے خارجہ، دولت مشترکہ اور ترقی کے دفتر میں وزیر و پارلیمانی انڈر سیکرٹری آف سٹیٹ ہمیش فالکنر، پاکستان میں برطانوی ہائی کمشنر جین میریٹ، وزیر کے پرسنل اسسٹنٹ کالم میتھیوز، پولیٹیکل کونسلر زوئی ویئر، ڈپٹی پولیٹیکل کونسلر مارک بیلی اور ہائی کمشنر کے پرنسپل پولیٹیکل ایڈوائزر ثاقب ریاض بھی شامل تھے۔