کل ایک کٹھن رات گزری، تمام اسرائیلی سوگوار ہیں، نیتن یاہو
شیعہ نیوز: شمالی غزہ میں تین فوجیوں کی ہلاکت پر اسرائیلی وزیر اعظم نیتن یاہو اور وزیر جنگ نے اظہار افسوس کرتے ہوئے حماس کے خلاف جنگ جاری رکھنے کا عزم ظاہر کیا ہے۔
رپورٹ کے مطابق شمالی غزہ میں تین اسرائیلی فوجیوں کی ہلاکت پر اسرائیلی وزیر اعظم نیتن یاہو نے ردعمل ظاہر کرتے ہوئے کہا کہ یہ ایک سخت رات تھی اور پورا اسرائیل اپنے تین فوجیوں کی ہلاکت پر غمگین ہے۔ انہوں نے اسرائیل کی سلامتی، حماس کی شکست اور مغویوں کی واپسی کے لیے جانفشانی سے قربانی دی۔‘
ادھر صیہونی وزیر جنگ یسرائیل کاتز نے بھی ردعمل دیتے ہوئے کہا کہ ہم نے اپنے بیٹوں میں سے تین کو کھو دیا ہے۔ میں ان تمام سپاہیوں کو سلام پیش کرتا ہوں جو مغویوں کی واپسی، شہریوں کی سلامتی اور حماس کی شکست کے لیے جنگ جاری رکھے ہوئے ہیں۔
یہ بھی پڑھیں : ایرانی میزائلوں کے مقابلے میں امریکہ کے پیٹریاٹ سسٹم کی ناکامی
اسرائیلی فوج نے پیر کی رات اعلان کیا کہ اُس کی 401 بریگیڈ کے تین فوجی شمالی غزہ میں جاری لڑائی کے دوران مارے گئے ہیں، جبکہ ایک افسر شدید زخمی ہوا ہے۔
عبرانی ذرائع کے مطابق، یہ واقعہ شمالی نوارِ غزہ کے علاقے جبالیا میں اس وقت پیش آیا جب فلسطینی مزاحمت کاروں نے ایک صہیونی ٹینک پر اینٹی ٹینک میزائل سے حملہ کیا۔
اس حملے میں ٹینک کے اندر موجود تین فوجی موقع پر ہی ہلاک ہو گئے، جبکہ چوتھا شدید زخمی ہوا۔
یہ واقعہ نہ صرف اسرائیلی فوج کے لیے ایک سنگین دھچکا ہے بلکہ اس سے اسرائیل کے اندرونی دباؤ اور فوجی نقصان میں مسلسل اضافے کی عکاسی بھی ہوتی ہے۔
