بھلوال، شیعہ تنظیموں کی احتجاجی ریلی، ایران و عراق کے زمینی سفر پر پابندی کے خلاف نعرے بازی

شیعہ نیوز : فقہ جعفریہ کی مختلف تنظیموں کی احتجاجی ریلی، ایران و عراق کے زمینی سفر پر پابندی کے خلاف نعرے باز ی ۔

تفصیلات کے مطابق فقہ جعفریہ کے زیرِ اہتمام ایک احتجاجی ریلی نکالی گئی جو مرکزی امام بارگاہ سے شروع ہو کر منشی چوک بھلوال تک پہنچی۔

ریلی میں بڑی تعداد میں شہریوں نے شرکت کی اور حکومتِ پاکستان کی جانب سے ایران اور عراق کے زمینی سفر پر عائد پابندی کے خلاف شدید احتجاج کیا۔

مظاہرین کا کہنا تھا کہ حکومت نے موجودہ ملکی و علاقائی صورتحال کو جواز بنا کر زائرین کے لیے زمینی سفر پر پابندی عائد کی ہے، جس سے لاکھوں زائرین شدید متاثر ہو رہے ہیں۔

ان کا مؤقف تھا کہ زمینی راستے سے زیارت کے سفر کو روکا جانا مذہبی آزادی پر قدغن کے مترادف ہے۔شرکاء نے حکومت سے مطالبہ کیا کہ اس پابندی کو فوری طور پر ختم کیا جائے تاکہ زائرین اپنے مذہبی فرائض اور عقیدت کا سفر بخوبی ادا کر سکیں۔

ریلی کی قیادت مولانا غلام جعفر قمی ،سید ظہیر عباس شاہ سمیت دیگر رہنماؤں نے کی، مظاہرین نے ہاتھوں میں پلے کارڈز اور بینرز اٹھا رکھے تھے جن پر حکومت مخالف نعرے درج تھے۔ ریلی کے شرکاء نے پرجوش انداز میں نعرے بازی کرتے ہوئے اپنے مطالبات دہرائے۔