صہیونی حکام جان چکے ہیں کہ حزب اللہ پوری طرح تیار ہے، شیخ نعیم قاسم

شیعہ نیوز:حزب اللہ لبنان کے ڈپٹی سیکرٹری جنرل شیخ نعیم قاسم نے صہیونی فضائی جارحیت کے ردعمل میں حزب اللہ کے راکٹ حملوں کی جانب اشارہ کرتے ہوئے کہا ہے: "حزب اللہ لبنان جنگ کے درپے نہیں ہے لیکن اگر صہیونی دشمن ہماری سرزمین پر جارحیت کرے گا تو حزب اللہ لبنان اسے منہ توڑ جواب دے گی اور یہ وہی حقیقت ہے جو چند دن پہلے رونما ہوئی ہے۔” شیخ نعیم قاسم نے مزید کہا: "اسرائیل کی غاصب صہیونی رژیم لبنان کی خودمختاری اور حاکمیت کی خلاف ورزی کی مرتکب ہوتی ہے اور اگر اسے مناسب جواب نہ دیا جائے تو وہ یہ خلاف ورزی جاری رکھے گی۔” انہوں نے کہا کہ چند دن پہلے صہیونی جنگی طیاروں نے جنوبی لبنان میں جارحانہ اقدام انجام دیتے ہوئے بمباری کی اور ہم نے بھی اس کا جواب دیا ہے۔

حزب اللہ لبنان کے ڈپٹی سیکرٹری جنرل شیخ نعیم قاسم نے کہا: "اگر ہم صہیونی جارحیت کا جواب نہ دیتے تو وہ دوبارہ جارحانہ اقدام انجام دیتا تاکہ یہ جانچ سکے کہ ہم کوئی ردعمل ظاہر کرتے ہیں یا نہیں۔ صہیونی دشمن اب بخوبی اس حقیقت سے واقف ہو چکا ہے کہ لبنان میں اندرونی سطح پر درپیش تمام تر مشکلات کے باوجود ہم ہر قسم کی بیرونی جارحیت کا مقابلہ کرنے کیلئے پوری طرح تیار اور آمادہ ہیں۔” یاد رہے حزب اللہ لبنان نے جنوبی لبنان پر صہیونی جنگی طیاروں کے فضائی حملوں کے جواب میں لبنان کی سرحد کے قریب مقبوضہ شبعا کھیتوں میں صہیونی فوجی ٹھکانوں کو راکٹ حملوں سے نشانہ بنایا۔ اس بارے میں حزب اللہ لبنان نے اپنے جاری شدہ بیانیے میں کہا: "شہیدان علی کامل محسن اور محمد قاسم طحان یونٹس نے شبعا کے مقبوضہ کھیتوں میں صہیونی ٹھکانوں کو نشانہ بنایا ہے۔ یہ حملے صہیونی جارحانہ اقدام کے جواب میں انجام پائے ہیں۔”