پنجاب حکومت کیجانب سے مطالبات پر عملدرآمد کی یقین دہانی، ایم ڈبلیو ایم کا 2 ستمبر کا دھرنا مؤخر
شیعہ نیوز ( پاکستانی شیعہ خبر رساں ادارہ)پاکستان مسلم لیگ (ن) اور پنجاب گورنمنٹ کی جانب سے ایم این اے پرویز ملک اور خواجہ عمران نذیر نے مجلس وحدت مسلمین کے صوبائی سیکرٹریٹ لاہور میں مجلس وحدت مسلمین پنجاب کے سیکرٹری جنرل علامہ مبارک موسوی و دیگر رہنماوں سے ملاقات کی اور مجلس وحدت مسلمین کے رہنماوں کو وزیراعلٰی پنجاب اور وفاقی وزیر داخلہ کا پیغام پہنچاتے ہوئے پنجاب گورنمنٹ کی طرف سے یقین دہانی کروائی کہ آپ کے مطالبات پر عملدرآمد کو یقینی بنایا جائے گا۔ انہوں نے علامہ مبارک موسوی سے درخواست کی کہ وہ 2 ستمبر کے دھرنے کے اعلان کو واپس لیں۔
زرائع کے مطابق پنجاب حکومت کے وفد سے ملاقات میں انکی جانب سے مطالبات پر عملدرآمدکی یقین دہانی کرائے جانے کے بعد مجلس وحدت مسلمین صوبہ پنجاب کے سیکریٹری جنرل نے میڈیا کے نمائندوں سے گفتگو کرتے ہوئے کہا کہ ہم پنجاب حکومت کے نمائندوں کو خوش آمدید کہتے ہیں اور وفاقی وزیر داخلہ چودھری نثار کے بھی مشکور ہیں کہ ہمارے مطالبات پر مثبت پیشرفت جاری ہے، لھذا ہم ان تمام معاملات کو دیکھتے ہوئے پنجاب حکومت کی جانب سے مکمل یقین دہانی پر 2 ستمبر کے دھرنے کو موخر کرنے کا اعلان کرتے ہیں، امید ہے کہ ہمیں اگلے کسی دھرنے کی تاریخ کا اعلان نہیں کرنا پڑیگا، ہم پاکستان میں دہشتگردی کا مکمل خاتمہ اور قیام امن کیلئے نیشنل ایکشن پلان پر مکمل علمدرآمد چاہتے ہیں، عزاداری امام حسینؑ ہمارا آئینی حق ہے، ہم اس پر قدغن کو قبول نہیں کریں گے۔
پاکستان مسلم لیگ (ن) کے رہنما پرویز ملک نے مجلس وحدت مسلمین کے رہنماوں کا شکریہ ادا کرتے ہوئے کہا کہ ان شاء اللہ ہم مجلس وحدت مسلمین کے تحفظات دور کرنے اور ان کے مطالبات پر عملدرآمد کیلئے فوری اقدامات کریں گے، پاکستان میں بسنے والے تمام مکاتب فکر کو اپنی عبادات اور رسومات کی ادائیگی کی آزادی حاصل ہے اور اسے یقینی بنانے کیلئے ہم بھرپور کردار ادا کریں گے۔
