پاکستان کے ہاتھوں بھارت کی عبرت ناک شکست کو 2 سال مکمل
شیعہ نیوز (پاکستانی شیعہ خبر رساں ادارہ) پلوامہ ڈرامے کے بعد بھارتی جارحیت اور پاکستان کے ہاتھوں عبرت ناک شکست کو دو سال مکمل ہوگئے ہیں۔
تفصیلات کے مطابق بھارت نے 26 فروری 2019 کو بالاکوٹ پر سرجیکل اسٹرائیک کا جھوٹا دعویٰ کیا تھا۔ بھارتی طیارے پاکستانی حدود میں گھسے لیکن شاہینوں سے بچنے کے لیے اپنا پے لوڈ گرا کر بھاگ نکلے جس سے پاکستان کے چند اہم درختوں کو نقصان پہنچا۔ اگلے ہی دن پاکستان نے دن کی روشنی میں دشمن کو منہ توڑ جواب دیا۔
یہ خبر بھی پڑھیں 27 فروری 2019کوقوم کی حمایت سے پاکستان کا بھرپور دفاع کیا، پاک فوج
پاک فضائیہ کے جوانوں نے جرات اور بہادری کے ساتھ بھارتی اہداف کو نشانہ بنایا۔ 27 فروری کو بھارتی ائیر فورس کے طیارے نے پاکستان کی حدود کی خلاف ورزی کی۔ جس پر پاک فضائیہ نے بھارتی ائیر فورس کے طیارے کو مار گرایا اور پائلٹ ابھی نندن کو گرفتار کرلیا۔
بھارت نے 26 فروری 2019 کو بالاکوٹ کے مقام جابا پر مبینہ دہشتگردی کے کیمپ پر نام نہاد فضائی حملے کا ڈرامہ رچایا۔ میڈیا ٹیمز علاقے میں پہنچی تو وہاں نا کسی عمارت کو نقصان پہنچا تھا نا ہی کسی قسم کی ہلاکتوں کے کوئی آثار ملے۔
جابہ ضلع مانسہرہ کے ایک گاؤں کا نام ہے جو شہر سے تقریباً 20 کلو میٹر کی مصافحت پر بالاکوٹ روڈ پر واقع ہے اور مظفرآباد تھانے کی حدود میں آتا ہے۔ علاقہ مکینوں نے بھی وہی بتایا جو کیمرے کی آنکھ نے دکھایا۔ وہاں کے عوام کا کہنا تھا کہ بھارتی طیارے چند منٹ کے دوران کھلے میدان میں بم پھینک کر فوری واپس چلے گئے۔ مقامی افراد کے مطابق جہاں بم پھینکے گئے وہاں نا کوئی عمارت تھی نا ہی کی ہلاکتیں ہوئیں۔ گاؤں دیگر علاقوں کی نسبت کم گنجان آباد ہے اور اطراف بلند پہاڑی چوٹیاں ہیں۔
