اسلامی جمعیت طلبہ کی پشاور یونیورسٹی میں بھی مذہبی منافرت پھیلانے کی کوشش

جامعہ پنجاب کے بعد پشاور یونیورسٹی میں بھی تدریسی ماحول خراب کرنے اور مذہبی منافرت پھیلانے کی کوشش کی جا رہی ہے، اسلامی جمعیت طلباء کی ذیلی شاخ کی جانب سے لگائے گئے بک سٹال میں فرقہ واریت پر مبنی قابل اعتراض کتب رکھی گئی ہیں، جس پر یونیورسٹی انتظامیہ نے اب تک کوئی ایکشن نہیں لیا، امامیہ اسٹوڈنٹس آرگنائزیشن پشاور کے سیکرٹری اطلاعات حسن جان نے اسلام ٹائمز کو بتایا کہ یونیورسٹی آف پشاور میں اسلامی جمعیت طلباء کی ذیلی شاخ سٹیڈی ایڈ فائونڈیشن فار ایکسی لینس (سیف) کی جانب سے بک سٹال لگایا گیا ہے، جس میں اہل تشیع کیخلاف غلیظ مواد پر مبنی کتب رکھی گئی ہیں۔

ان کا کہنا تھا کہ مذکورہ بک سٹال میں ”دستاویز۔۔شیعہ مسلمان یا کافر۔ فیصلہ آپ کریں” کے عنوان سے موجود کتاب کے بارے میں جب سٹال کی انتظامیہ کے اراکین سے رابطہ کیا گیا تو انہوں نے اس قابل اعتراض اور فرقہ وارانہ کتاب کو ہٹانے کی بجائے مناظرے کے چیلنج دینا شروع کر دیئے۔ 

 امامیہ اسٹوڈنٹس آرگنائزیشن پشاور ڈویژن کے صدر ثاقب بنگش نے پشاور یونیورسٹی میں لگائے گئے بک سٹال میں متنازعہ کتب کی موجودگی پر تشویش کا اظہار کرتے ہوئے یونیورسٹی انتظامیہ سے مطالبہ کیا ہے کہ اس حوالے سے فوری طور پر نوٹس لیا جائے، اپنے ایک بیان میں ان کا کہنا تھا کہ اسلامی جمعیت طلبا کی ذیلی شاخ سٹیڈی ایڈ فائونڈیشن فار ایکسی لینس (سیف) کی جانب سے لگائے گئے بک سٹال میں فرقہ وارانہ مواد پر مبنی کتب کی موجودگی ہر گز برداشت نہیں کی جائے گی، انہوں نے کہا کہ پشاور یونیورسٹی ٹیچرز ایسوسی ایشن (پیوٹا) جامعہ پشاور میں مذہبی منافرت پھیلانے کی مرتکب ہو رہی ہے، لہٰذا اس روش کو فوری طور پر ترک کرنا ہوگا، انہوں نے کہا کہ اس سلسلے میں جمعتہ المبارک کو وائس چانسلر پشاور یونیورسٹی سے ملاقات کی جائے گی۔