وفاقی وزارت داخلہ نے گلگت بلتستان میں سوشل میڈیا کو بلاک کرنے کا حکم دے
دیا وفاقی وزارت داخلہ نے گلگت بلتستان میں فرقہ واریت کو کنٹرول کرنے کیلئے سوشل میڈیا کو بلاک کرنے کیلئے ایف آئی اے کے سائبر کرائم کنٹرول سیل کو ہدایات جاری کر دیں۔ پیر کو وزارت داخلہ کے ذرائع کے مطابق محکمہ داخلہ گلگت بلتستان نے وزارت داخلہ کو آگاہ کیا ہے کہ فرقہ وارانہ فسادات میں ملوث بعض عناصر علاقہ میں موبائل فون سروس بند ہونے کے بعد ٹویٹر اور فیس بک کو منظم انداز میں اپنی پیغام رسانی اور دیگر مقاصد کیلئے استعمال کر رہے ہیںوزارت داخلہ کے ذرائع کے مطابق گلگت بلتستان کے ہوم ڈیپارٹمنٹ کی طرف سے وفاقی وزارت داخلہ کو ایک مراسلہ ارسال کیا گیا ہے جس میں صوبے میں سوشل میڈیاٹویٹر، فیس بک اور مختلف ویب سائٹس کو بلاک کرنے کی درخواست کرتے ہوئے کہا گیا ہے کہ شیعہ و سنی مسالک کے وہ لوگ جو فرقہ واریت پھیلانے اور ماحول کو خراب کرنے میں مصروف ہیں وہ سوشل میڈیا کے ذریعے بھرپور انداز میں مہم چلا رہے ہیں۔ وزارت داخلہ نے ہوم ڈیپارٹمنٹ کی اس درخواست پر عملدرآمد کیلئے ایف آئی اے کے سائبر کرائم ونگ کو ہدایات جاری کر رہی ہیں اور سوشل میڈیا کی مانیٹرنگ اور اسے بلاک کرنے کا حکم دیا ہے۔
