اسلامی شعائر کی توہین آمیز تصاویر کی اشاعت قابل مذمت ہے، علامہ ساجد نقوی
ملی یکجہتی کونسل پاکستان کے مرکزی سینئر نائب صدر علامہ سید ساجد علی نقوی نے مقبوضہ کشمیر کے علاقے کشتواڑ میں انٹرنیٹ پر اسلام مخالف تصویروں کی اشاعت کی سخت مذمت کرتے ہوئے کہا ہے کہ انٹرنیٹ پر قرآن پاک اور خانہ کعبہ کی توہین آمیز تصاویر شائع کرنے کا مقصد مسلمانوں کے مذہبی جذبات کو بھڑکا کر انہیں اشتعال دلانا ہے۔ انہوں نے کہا کہ اسلام اور مسلمانوں کے خلاف روز اول سے سازشیں ہوتی آئی ہیں اور یہ مذموم کوشش بھی اسی عالمی سازش کا حصہ لگتی ہے۔
انہوں نے مزید کہا کہ اسلام دشمن قوتوں کی سازشوں کا مقابلہ کرنے کے لئے مسلمانوں کے درمیان اتحاد و وحدت کی ضرورت ہے۔ مسلمان متحد ہو کر عالمی استعماری طاقتوں اور ان کے ایجنٹوں کی سازشوں کا مقابلہ کرسکتے ہیں۔ علامہ ساجد نقوی نے کہا کہ ملت مسلمہ پاکستان نے گستاخانہ فلم کے خلاف اتحاد ووحدت کا مظاہرہ کرکے دشمنوں کے عزائم خاک میں ملادیئے تھے۔ انہوں نے کہا کہ او آئی سی اس قسم کے واقعات کو روکنے کے لئے اپنا کردار بھرپور طریقے سے ادا کرے اور اقوام متحدہ کو بھی اس سلسلے میں اپنا کردار ادا کرنا چاہیے۔
