بیگناہ شیعہ نوجوانوں کی گرفتاری کے خلاف نمائش چورنگی پر احتجاجی علامتی دھرنا
شیعت نیوز کے نمائندئے کے مطابق آل پاکستان شیعہ ایکشن کمیٹی کی جانب سے پولیس کے ہاتھوں بیگناہ شیعہ نوجوانوں کی بلاجواز اور انہیں جھوٹے مقدمات میں پھنسانے کے خلاف نمائش چورنگی احتجاجی علامتی دھرنا دیا گیا ۔ دھرنے سے خطاب کرتے ہوئے آل پاکستان شیعہ ایکشن کمیٹی کے سربراہ علامہ مرزا یوسف نے کہا کہ پولیس اور انتظامیہ جانبداری کا مظاہرہ کرتے ہوئے پرامن شیعان حیدر کرار ع کے گھروں میں داخل ہو کر چادر و چار دیواری کو پامال کرتے ہوئے بیگناہ شیعہ نوجوانوں کو بلاجواز گرفتار کر رہی ہے اور گرفتار کرتے ہوئے شیعہ مکتب فکر کے خلاف نعرے بھی لگاتی ہے کہ تم کافر ہو۔ جبکہ ہم کہتے ہیں کہ کافر اور منافق تو یہ پولیس ہے جو آل رسول ص کی دشمن ہے۔
رہنماوں نے مزید کہا کہ ریاستی ادارے، پولیس اور حکومت شیعان علی پر ظلم کے پہاڑ توڑ رہی ہے۔ انہوں نے کہا کہ ملت تشیع نے قربانی دے کر پاکستان بنایا ہے اور ملت تشیع پاکستان سے محبت کرتی ہے اور اس کی تعمیر و ترقی میں نہایت اہم کردار ادا کر رہی ہے۔ انہوں نے کہا کہ پولیس اور جانبدار انتظامیہ بیگناہ شیعہ جوانوں کو بلاجواز گرفتار کرکے ان پر جھوٹے مقدمات قائم کرکے ایک طرف تو مکتب تشیع کو بدنام کر رہی ہے دوسری جانب شیعہ سنی مسلمانوں میں ایک دوسرے کیلئے نفرتیں پیدا کرنے کی ناپاک سازش کر رہی ہے۔ اس موقع پر شیعہ اسیروں کے عزیز و اقارب کی بھی بڑی تعداد میں موجود تھی۔ مظاہرین نے کراچی پولیس اور ظالم انتظامیہ کے خلاف نعرے لگائے اور اپنے عزیزوں کی فوری رہائی کا مطالبہ کیا۔