پاکستانی شیعہ خبریں
امریکہ جنگی مجرم ہے،ایران پر پابندیوں کی مذمت کرتے ہیں
مجلس وحدت مسلمین پاکستان کے مرکزی رہنماعلامہ ناصر عباس جعفری نے سیکورٹی کونسل کی طرف ایران پر پابندیاںعائدکرنے پر مذمت کرتے ہوئے کہا کہ امریکہ دنیا کا واحد ایٹمی ملک ہے جس نے اس کا غلط استعمال کیا ہے لہٰذا ایک جنگی مجرم کو کیسے حق پہنچتا ہے کہ وہ کسی پرُامن ملک کے خلاف پابندیوں کی قرارداد پیش کرے۔انھوں نے سیکورٹی کونسل کی جانب سے ایران پر پابندیاںعائد کرنے کی شدید الفاظ میں مذمت کی اور اِسے مسلم ملک کےخلاف متعصب رویہ قرار دیا۔شیعت نیوز کے نمائندے کی رپورٹ کے مطابق العار ف ہاؤس اسلام آباد سے جاری ہونے والے بیان میں انہوں نے کہا کہ ایران کی غیور عوام وحدت اور ایمانی جذبے سے ماضی کی طرح ا ن پابندیوں کا سامنا کرے گی اور عالمی سامراج امریکہ کو ہر محاذ پر شکست دے گی۔ انہوں نے کہا کہ ایران امریکہ کی کسی بھی مذموم کوشش کو کامیاب نہیں ہونے دے گا اور ہر محاز پر اس کے خلاف سینہ سپر ہوگا۔ علامہ ناصر عباس جعفری نے کہا کہ تمام مسلم ممالک کو اکھٹا ہوجانا چاہیے تاکہ اس خطے میں امریکہ کو روکا جاسکے۔