کربلائی بننے کیلئے کربلا والوں کی سیرت پر عمل پیرا ہونا پڑیگا، علامہ اعجاز بہشتی
شیعہ نیوز (ملتان) مجلس وحدت مسلمین پاکستان کے شعبہ وحدت یوتھ کے زیراہتمام یوم عشق امام حسین علیہ السلام مرکزی سیکرٹریٹ وحدت یوتھ ملتان میں منایا گیا۔ تقریب کی صدارت مرکزی چیئرمین وحدت یوتھ سید فضل عباس نقوی نے کی جبکہ تقریب کے مہمان خصوصی مجلس وحدت مسلمین پاکستان کے مرکزی رہنما علامہ اعجاز حسین بہشتی تھے۔ اس موقع پر یوتھ کی ایک بڑی تعداد موجود تھی۔ تقریب سے شعرائے کرام اور منقبت خواں حضرات نے بارگاہ سید الشہداء (ع) میں نذرانہ عقیدت پیش کیا۔ یوم عشق حسین (ع) سے مرکزی خطاب کرتے ہوئے علامہ اعجاز حسین بہشتی کا کہنا تھا کہ آج اپنے امام کے ساتھ حقیقی عشق کی ضرورت ہے، اگر ہم اپنے آپ کو کربلائی کہتے ہیں تو کربلا والوں کے نقش قدم پر چلنا ہوگا۔ انہوں نے کہا کہ کربلائی بننے کیلئے کربلا والوں کی سیرت پر عمل پیرا ہونا پڑے گا۔ علامہ اعجاز بہشتی کا مزید کہنا تھا کہ آج ہمیں کربلا میں موجود جانثاروں کے عشق سے اپنے آپ کو سرشار کرنا ہوگا تاکہ ہم بھی اپنے امام علیہ السلام کے سامنے سرخرو ہو سکیں۔
