پاکستان کو دہشتگردوں کی فیکٹری نہیں بننے دینگے، علامہ ناصر عباس جعفری

شیعہ نیوز (سرگودھا) مجلس وحدت مسلمین پاکستان کے سیکرٹری جنرل علامہ راجہ ناصر عباس جعفری نے کہا ہے کہ سانحہ ماڈل ٹاون انتہائی شرمناک ہے، بے گناہوں کو قتل کیا گیا اور ہم ڈاکٹر طاہر القادری کے ساتھ مکمل یکجہتی کا اظہار کرتے ہیں، ڈاکٹر طاہر القادری جلوس نکالیں، دھرنے دیں یا حکومت کیخلاف لانگ مارچ کریں، ہم انکے ساتھ ہیں، منہاج القرآن کے کارکنوں کو قتل کر کے انہیں فوج کی حمایت کرنے کی سزا دی گئی۔ ان خیالات کا اظہار انہوں نے سرگودھا کی تحصیل بھلوال کی مرکزی امام بارگاہ میں عظمت شہدا کانفرنس سے خطاب کرتے ہوئے کیا۔ علامہ راجہ ناصر عباس جعفری نے کہا کہ مجلس وحدت مسلمین نے ایک سیاسی قوت بننے کا فیصلہ کر لیا ہے، اگرچہ یہ ایک مشکل کام ہے لیکن اگر ہم سیاسی طاقت نہیں بنیں گے تو اپنے حقوق کے لیے بھیک مانگنا پڑے گی، لیکن پھر بھی ٹھوکریں ملتی رہیں گی۔ انہوں نے کہا کہ ملک کو دہشت گردوں کی فیکٹری نہیں بننے دیں گے، پاکستان کے شیعہ اور سنی اکٹھے ہو جائیں تو پھر وہی ہو گا جو یہ چاہیں گے۔ علامہ راجہ ناصر عباس جعفری نے سانحہ ماڈل ٹاون کے متعلق حکومت پر تنقید کرتے ہوئے کہا کہ وزیر اعلیٰ پنجاب شہباز شریف کا یہ کہنا کہ انہیں پولیس گردی کا علم ہی نہیں تھا، ایک جھوٹ ہے۔ علامہ راجہ ناصر عباس نے کہا کہ اہلسنت نے راولنڈی واقعہ کے موقع پر ہمارا ساتھ دیا، ہم انکے شانہ بشانہ چلیں گے، لیکن اپنے حقوق کے لیے ہتھیار نہیں اٹھائیں گے، بلکہ عوامی جد و جہد کریں گے اور انشاءاللہ کامیابی ہمارا مقدر ٹھہرے گی۔