تحفظ پاکستان بل کو دہشتگردوں کے بجائے سیاسی رقیبوں کے خلاف استعمال کیا جائے گا، ایم ڈبلیو ایم
شیعہ نیوز (لاہور) مجلس وحدت مسلمین پنجاب کے صوبائی کابینہ کا اجلاس صوبائی سیکرٹریٹ مسلم ٹاوُن میں سیکرٹری جنرل علامہ عبدالخالق اسدی کی زیر صدارت منعقد ہوا، جس میں کابینہ کے تمام اراکین شریک ہوئے۔ اجلاس میں آپریشن ضرب عضب کی مکمل حمایت کرتے ہوئے اسے عین جہاد قرار دیا اور آپریشن کی تاخیر سے ہونے والی شہادتوں جس میں افواج پاکستان اور سویلین افراد شامل ہے کا ذمہ دار موجودہ حکمرانوں کو قرار دیا۔ اجلاس میں سانحہ ماڈل ٹاوُن کی بھر پور مذمت کی گئی اور اسے بدترین ریاستی دہشت گردی قرار دیتے ہوئے کہا کہ سانحہ ماڈل ٹاوُن نام نہاد جمہوری حکمرانوں کے ماتھے پر نہ مٹنے والا بدنما داغ ہے اس سانحے کی غیر جانبدارانہ تحقیقات اور منہاج القرآن کے درخواست میں نامزد ملزمان کے خلاف فوری ایف آئی آر کے انداراج کا مطالبہ بھی کیا گیا۔ علامہ عبدالخالق اسدی نے کہا کہ درجن سے زائد شہداء کے ورثا کو اب تک انصاف نہ ملنا عدل و انصاف کے ایوانوں پر سوالیہ نشان ہے۔
اجلاس میں کراچی میں آئے روز کی ٹارگٹ کلنگ اور ہزاروں شہداء کے قاتلوں کی عدم گرفتاری کو سندھ حکومت کی قاتلوں سے ساز باز کا نتیجہ قرار دیا۔ اجلاس میں بھکر میں پنجاب حکومت کی جانب انتہا پسندوں کی ایماء پر ملت جعفریہ کے بے گناہ 130 افراد کو فورتھ شیڈول میں شامل کرنے کی مذمت کرتے ہوئے اسے انتقامی کاروائی قرار دیا گیا۔ اجلاس میں خدشہ ظاہر کیا گیا کہ تحفظ پاکستان بل کو انتہا پسندوں اور دہشت گردوں کی بجائے سیاسی مخالفین کے خلاف استعمال کیا جائے گا۔ اجلاس میں اے جی آفس میں ہونے والے کروڑوں کی بدعنوانیوں پر کرپشن مافیا کو حکومت پنجاب کی جانب سے تحفظ دینے کی مذمت کرتے ہوئے فوری تحقیقات کا مطالبہ کیا گیا۔ اجلاس میں فیصلہ کیا گیا کہ یوم القدس کو پاکستان بھر میں امامیہ سٹوڈنٹس آگنائزیشن پاکستان کے ساتھ مل کر بھر پور شایان شان طریقے سے منایا جائے گا۔
