بلوچستان میں تکفیری ٹولے کے ٹریننگ کیمپس کیخلاف آپریشن شروع کیا جائے، علامہ مقصود ڈومکی

شیعہ نیوز (پاکستانی شیعہ خبر رساں ادارہ) مجلس وحدت مسلمین بلوچستان کے سربراہ علامہ مقصود علی ڈومکی نے کہا ہے کہ کوئٹہ میں دہشت گردی کے افسوسناک واقعات حکومتی کارکردگی پر سوالیہ نشان ہے، دہشت گردوں کے خلاف آپریشن ضرب عضب کا دائرہ انسانیت کے قاتل ان دہشت گردوں تک بڑھایا جائے، بلوچستان کے مختلف اضلاع میں کالعدم تکفیری ٹولے کے ٹریننگ کیمپس ہیں، جن کے خلاف آپریشن کا آغاز کیا جائے۔ تکفیری گروہ امت مسلمہ کے لئے ناسور بن چکا ہے، جس نے دہشت گردی اور قتل و غارت گری کو اپنا دین سمجھ رکھا ہے۔ ان سے نجات کے لئے امت مسلمہ متحد ہوجائے۔ انہوں نے کہا کہ تکفیری گروہ سے متعلق دہشت گردوں نے سب سے بڑھ کر دین اسلام کو نقصان پہنچایا ہے، امت محمد (ص) اپنی بیداری اور اتحاد کے ذریعے، عالم انسانیت کو امن و رحمت اور احترام انسانیت پر مبنی اسلام کا حقیقی پیغام پہنچائے۔ در ایں اثناء مجلس وحدت مسلمین یوتھ ونگ کے صوبائی مسئول عبدالوہاب لغاری کی قیادت میں ایک وفد نے علامہ مقصود علی ڈومکی سے ملاقات کی، اس موقع پر علامہ مقصود علی ڈومکی نے کہا کہ بلوچستان میں جوانوں کی انقلابی الٰہی تعلیمات کے سائے میں تعلیم و تربیت یوتھ ونگ کی بنیادی ذمہ داری ہے۔ جوان اپنے پاکیزہ جذبات کے باعث معاشرے کو بدلنے کی صلاحیت رکھتے ہیں۔