مظلوم فلسطینیوں پر وحشیانہ صہیونی حملوں کا سلسلہ بند کرایا جائے، علامہ سید ساجد علی نقوی
شیعہ نیوز (پاکستانی شیعہ خبر رساں ادارہ)شیعہ علما کونسل پاکستان کے سربراہ علامہ ساجد علی نقوی نے فلسطینی عوام کے خلاف غاصب صیہونی حکومت کے غیر انسانی اقدامات کی شدید مذمت کرتے ہوئے کہا کہ اقوام متحدہ اور او آئی سی سمیت انسانی حقوق کے بین الاقوامی ادارے بیت المقدس اور مسجدالاقصٰی کی بے حرمتی کرنے اور 19 روز سے جاری اسرائیلی حکومت کی جارحیت و بربریت کو روکنے کیلئے فی الفور اقدامات کریں۔ راولپنڈی سے جاری ہونے والے اپنے بیان میں ایس یو سی کے سربراہ نے کہا ہے کہ بیت المقدس میں یہودی بستیوں کے دفاع کی آڑ میں اسرائیلی حکومت کی جانب سے نہتے عوام کے خلاف غیر انسانی اقدامات سمیت گذشتہ کئی ہفتوں سے مظلوم فلسطینیوں پر غاصب صیہونی فوجیوں اور صیہونی آباد کاروں کے وحشیانہ حملوں کا سلسلہ بند کرایا جائے۔ جس میں اب تک کئی فلسطینی جوان شہید اور سینکڑوں زخمی ہو چکے ہیں۔
علامہ ساجد علی نقوی نے کہا ہے کہ مسجد الاقصٰی پر صیہونی فوجیوں اور صیہونی آبادکاروں کے حملے اور فلسطینی نمازیوں کے مسجد میں داخلے کی روک تھام سے پورے علاقے کی صورت حال سخت کشیدہ ہوگئی ہے۔ واضح رہے کہ صیہونی فوجی اور صیہونی آبادکار، مسجد الاقصٰی پر حملہ کرکے زمان و مکان کی حیثیت سے اسے تقسیم کرنے کی سازش کر رہے ہیں۔ سلامتی کونسل کے اجلاس میں فرانس کی جانب سے فلسطینیوں اور یہودیوں کے درمیان حالیہ کشیدگی کے مرکز اور مقدس مقام مسجد الاقصٰی میں عالمی مبصرین کی تعیناتی پر جمہوریت کے علمبردار امریکہ کی مخالفت کہ مسجد الاقصٰی میں عالمی مبصرین کی ضرورت نہیں، عالم اسلام کے لئے کھلم کھلا چیلنج ہے۔ علامہ ساجد علی نقوی نے غاصب صیہونی حکومت کی جارحیت اور فلسطینیوں کے حقوق کی پامالی کے خلاف احتجاج کرتے ہوئے ان ظالمانہ اقدامات کی سخت الفاظ میں مذمت کرتے ہوئے اقوام متحدہ کی جنرل اسمبلی اور جنیوا کے چوتھے کنونشن پر دستخط کرنے والے ممالک سے مطالبہ کیا ہے کہ اس سے پہلے کہ وقت ہاتھ سے نکل جائے، غاصب اسرائیل کو انسانی حقوق کے چارٹر اور اس سے متعلقہ دیگر قوانین نیز جنیوا کے چوتھے کنونشن پر عمل درآمد کے لئے مجبور کریں
