پنجاب سے داعش کے دہشتگردوں کی گرفتاری کوئی حیران کن بات نہیں، علامہ ناصر عباس جعفری

شیعہ نیوز (پاکستانی شیعہ خبر رساں ادارہ)مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری نے مردان، دوسہرہ چوک میں نادرا آفس کے قریب ہونے والے دھماکہ کی شدید مذمت کرتے ہوئے کہا ہے کہ دہشت گردی کے خلاف جنگ کو ناکام بنانے کے لئے ملک دشمن طاقتیں سرگرم ہیں،تکفیری دہشت گردوں کے سہولت کار اور سرپرستوں کی کوشش ہے کہ کسی طرح اس جنگ کو متنازعہ بنا کر ناکامی سے دوچار کریں، پاکستان کی متنازعہ خارجہ پالیسی اور دفتر خارجہ کے مبہم بیانات اس بات کی واضح دلیل ہے۔ انہوں نے کہا کہ ہمارا ملک اس بات کا متحمل نہیں کہ ہم اغیار کی اقتدار اور مفادات کی جنگ کا حصہ بنے، دنیا بھر میںتکفیری دہشت گردوں کے سرپرست ناکام اور رسوا ہو رہے ہیں، مشرق وسطٰی میں جاری مفادات کی جنگ سے ہمیں دور رہنا ہوگا۔ علامہ ناصر عباس جعفری نے مردان دھماکے نتیجے میں جاں بحق ہونے والوں کی مغفرت اور زخمیوں کی جلد صحت یابی کے لئے دعا کرتے ہوئے کہا کہ معصوم لوگوں کو قتل کرنے والے درندہ صفت تکفیری دہشتگردوں اور ان کے سرغناوں کو اس ملک میں امن ہضم نہیں ہو رہا، تکفیری دہشتگردوں کے خلاف آپریشن مزید تیز کرنا ہوگا، مردان دھماکہ اس بات کی دلیل ہے کہ دہشتگرد ختم نہیں ہوئے بلکہ خاموش ہوگئے ہیں، ان درندہ صفت لوگوں کے کمین گاہوں کو چن چن کر ختم کرنا ہوگا۔

علامہ ناصر عباس جعفری نے مزید کہا کہ عوام کو جان و مال کا تحفظ فراہم کرنا صوبائی حکومت اور سکیورٹی اداروں کا اولین فرض ہے، حکومت عوام کو تحفظ فراہم کرے۔ انہوں نے سیالکوٹ ڈسکہ سے عالمی دہشت گرد داعش کے کارندوں کی گرفتاری پر تشویش کا اظہار کرتے ہوئے کہا کہ پنجاب میں کالعدم تکفیری دہشت گرد جماعت کا سربراہ پروٹوکول کے ساتھ مختلف مذہبی جماعتوں کے مراکز کے دوروں میں مصروف ہے اور ان مذہبی سیاسی جماعتوں کی جانب سے ان کو ویلکم کیا جا رہا ہے، ایسے میں پنجاب سےعالمی تکفیری دہشتگرد گروہ داعش کے دہشتگردوں کی گرفتاری کوئی حیران کن بات نہیں