لاہور ،مجلس وحدت مسلمین کا پنجاب اسمبلی کے سامنے احتجاجی دھرنا، سینکڑوں افراد کی شرکت
شیعہ نیوز ( پاکستانی شیعہ خبر رساں ادارہ )ملک بھر میں ٹارگٹ کلنگ اور نیشنل پلان کی آڑ میں دہشتگردی کے سب سے زیادہ متاثرہ مکتب فکر ملت جعفریہ کیخلاف حکومتی انتقامی کارروائیوں کیخلاف 13 مئی سے جاری مجلس وحدت مسلمین پاکستان کے سربراہ علامہ راجہ ناصر عباس جعفری بھوک ہڑتال تحریک پر حکومتی بے حسی کیخلاف ملک بھر کے 70 سے زائد اہم شاہراہوں پر علامتی دھرنے دیئے گئے، جو رات گئے تک جاری رہے، دھرنے میں مرد، خواتین اور بچوں کی بڑی تعداد نے شرکت کی۔
زرائع کے مطابق مجلس وحدت مسلمین کے سربراہ علامہ راجہ ناصر عباس جعفری کی ملک بھر باالخصوص پشاور،پارہ چنار،ڈیرہ اسمٰعیل خان اور کراچی میں جاری شیعہ ٹارگٹ کلنگ اور پنجاب حکومت کی جانب سے عزاداری کے خلاف کی جانے والی سازشوں کے خلاف ملک بھر کی طرح لاہور میں بھی مال روڈ پر اسمبلی ہال کے سامنے احتجاجی علامتی دھرنا دیا گیا۔ لاہور میں ہونیوالے مرکزی دھرنے کی قیادت مجلس وحدت مسلمین پاکستان کے مرکزی ڈپٹی سیکرٹری جنرل علامہ احمد اقبال رضوی نے کی۔ دھرنے میں علامہ حسن ہمدانی، علامہ سید حیدر علی الموسوی، علامہ ابوذر مہدوی، علامہ سید بشیر حسین رضوی، علامہ سید مبارک علی الموسوی، علامہ سید وقار الحسنین نقوی بھی شریک ہوئے۔
دھرنے سے خطاب کرتے ہوئے مجلس وحدت مسلمین پاکستان کے مرکزی ڈپٹی سیکرٹری جنر ل علامہ سید احمد اقبال رضوی نے کہا کہ پورے پاکستان میں ایک بار پھر سینکڑوں مقامات پر پُرامن دھرنوں سے حکمرانوں کو یہ بات باور کر لینی چاہیئے کہ ہم پُرامن ہیں، ہم اس ملک کے اصل وارث ہیں، ہم نے ایک پتا بھی نہیں توڑا، ہم اقبال و قائد کے پاکستان کو تلاش کرنے نکلے ہیں، اہل سنت و معتدل قوتیں ہماری اس تحریک میں شامل ہیں اور ساتھ ساتھ ہیں، جن تکفیریوں نے نیشنل ایکشن پلان کو ہائی جیک کر کے پاکستان کو خطرات سے دوچار کر دیا ہے ان سے پاکستان کو واپس لانا ہے، حکمران اور سیکیورٹی ادارے شیعیان حیدر کرار کے قاتلوں کو کیفر کردار تک پہنچائیں ورنہ یہ احتجاجی تحریک اسی جذبے کیساتھ آگے بڑھتی رہیگی۔ انہوں نے کہا کہ ہم پاکستان کو فرقہ وارانہ بنیادوں پر تقسیم نہیں ہونے دینگے اور اپنے اس احتجاجی تحریک کے اگلے مرحلے میں 7 اگست کو اسلام آباد میں قومی اجتماع ہو گا۔
دھرنے کے شرکاء سے خطاب کرتے ہوئے علامہ سید حیدر الموسوی نے کہا پوری پاکستانی قوم کی پکار ہیں کہ ہمیں پرامن اور مستحکم پاکستان چاہیئے، بدقسمتی سے ہمارے نااہل حکمرانوں اور ریاستی اداروں کی مصلحت پسندی نے ہم پر دہشتگردوں کو مسلط کر رکھا ہے، ہمارے دشمن اپنے مشن میں کامیاب ہوتے نظر آ رہے، پاکستان میں مٹھی بھر ایک مخصوص سوچ کا حامل تکفیری گروہ پُرامن اور نہتے عوام پر مسلط ہے، یہ دہشتگرد گروہ استکباری طاقتوں کا ایجنٹ ہے، ہم آج میدان میں اس لئے ہیں کہ آئندہ کسی پاکستانی کی کوئی لاش نہ گرے۔ علامہ حیدر الموسوی نے کہا کہ حکمران سن لیں ہم ہار ماننے والوں میں سے نہیں، نہ ہی تمھارے لولی پاپ پر احتجاج ختم کریں گے، ہم اپنے مطالبات پر عملدرآمد تک سڑکوں پر بیٹھیں گے، چاہے اس میں ہمیں ایک سال ہی کیوں نہ لگے، ہمارے قائدین کے اعلان کے ہم منتظر ہیں، اگر ہمارے خلاف سازشیں جاری رہی تو ہم عاشورا اسلام آباد میں منائیں گے۔
