دشمن کے چیلنج کا ڈٹ کے مقابلہ کریں گے، ثناءاللہ زہری
شیعہ نیوز ( پاکستانی شیعہ خبر رساں ادارہ)وزیراعلٰی بلوچستان ثناءاللہ زہری کہتے ہیں کہ ہم محب وطن اور اپنے وطن کے وارث ہیں، کوئی مائی کا لعل بلوچستان کو پاکستان سے الگ نہیں کرسکتا۔
زرائع کے مطابق 14 اگست جشنِ آزادی کی مناسبت سے زیارت میں پرچم کشائی کی تقریب سے خطاب کرتے ہوئے وزیر اعلیٰ بلوچستان ثناءاللہ زہری کا کہنا تھا کہ دہشت گردی کی جنگ کو ادھورا نہیں چھوڑنا چاہیئے، بہادر قومیں ہی سانحات کا مقابلہ کرتی ہیں، اُن سے سیکھتی ہیں اور اب انشاءاللہ تکفیری دہشتگردوں کو وار کرنے سے پہلے ہی ٹھکانے لگادیں گے۔ اطلاعات کے مطابق اس سے قبل صوبائی دارالحکومت میں 21 توپوں کی سلامی سے یوم آزادی کا آغاز ہوا، توپوں کی سلامی کے بعد بلوچستان اسمبلی میں پرچم کشائی سادہ مگر پروقار تقریب منعقد ہوئی، وزیراعلٰی بلوچستان نواب ثناءاللہ زہری نے پرچم کشائی کی، جبکہ قومی پرچم سے ہم آہنگ لباس زیب تن کئے بچوں نے خوبصورت ملی نغمے پیش کرکے بلاخوف و خطر آگے بڑھنے کا پیغام دیا۔ تقریب میں کمانڈر سدرن کمانڈ لیفٹیننٹ جنرل عامر ریاض، اسپیکر بلوچستان اسمبلی راحیلہ حمید درانی، پشتونخواہ ملی عوامی پارٹی کے سربراہ محمود خان اچکزئی، صوبائی وزراء اور دیگر اعلٰی سول و عسکری افسران شریک ہوئے۔
وزیراعلٰی بلوچستان نے سانحہ کوئٹہ کو المناک واقعہ قرار دیتے ہوئے کہا کہ ہمارے حوصلے پست نہیں ہوئے دشمن کے چیلنج کا ڈٹ کے مقابلہ کریں گے۔ انہوں نے کہا کہ اب ہم بلند حوصلے اور زیادہ تیاری کے ساتھ دشمن پر کاری ضرب لگائیں گے، کیوںکہ دہشت گردی کے خلاف جنگ میں ہم حق پر ہیں، اس لیے جیت بھی ہماری ہو گی آج ہم عزم کرتے ہیں کہ تکفیری دہشت گردوں سے اگلے قدموں پر لڑتے رہیں گے۔ وزیراعلٰی بلوچستان نے کہا کہ ہم محب وطن اور اپنے وطن کے وارث ہیں، کوئٹہ میں دہشت گردی کے باوجود خوف نہیں، کشمیر اور بلوچستان کے مسائل کی نوعیت الگ الگ ہے، بلوچستان کے وارث ہم ہیں مودی نہیں، ہم سو مرتبہ پیدا ہوکر سو مرتبہ بھی اپنے وطن پر قربان ہوں تو بھی کوئی غم نہیں۔ انہوں نے کہا کہ باہر بیٹھے لوگ آکر پاکستان کی سیاست کریں اور پہاڑوں پر چھپے لوگ آکر قومی دھارے میں شامل ہو جائیں، بندوق اٹھانے والے بھی الیکشن لڑ کر اپنی اہمیت کا اندازہ کرلیں، ہر آزاد ملک کو ترقی کرنے کا حق ہے، پاک چین اقتصادی راہ داری اغیار کی آنکھوں میں کھٹک رہی ہے لیکن ہم اپنی جانوں پر کھیل کر اقتصادی راہداری کی حفاظت کریں گے۔
