شیعہ علما کونسل کا ملک بھر میں تحفظ عزاداری کانفرنسز کروانے کا اعلان

شیعہ نیوز ( پاکستانی شیعہ خبر رساں ادارہ)شیعہ علما کونسل کے زیراہتمام ملک بھر میں ڈویژنل سطح پر تحفظ عزاداری کانفرنسیں منعقد کرنے کا فیصلہ کیا گیا ہے، جن کی صدارت اسلامی تحریک کے سربراہ علامہ سید ساجد علی نقوی کریں گے۔

زرائع کے مطابق شیعہ علماء کونسل پاکستان کے مرکزی سیکریٹریٹ سے جاری ہونے والے ایک اعلامیے میں کہا گیا ہے کہ ساہیوال ڈویژن کی تحفظ عزاداری کانفرنس 10 ستمبر، ملتان 11 ستمبر، 18 اگست کو سرگودھا میں پیغام کربلا اتحاد امت کانفرنس اور کراچی میں تحفظ عزا کانفرنس نشتر پارک میں منعقد کی جائے گی۔ ان کانفرنسوں میں علما و ذاکرین، معززین علاقہ، بانیان مجالس عزا، متولیان امام بارگاہان اور لائسنسداران جلوس ہائے عزا شریک ہوں گے۔ ان کانفرنسوں میں عزاداری سید الشہدا میں رکاوٹوں کا جائزہ لے کر آئندہ کا لائحہ عمل تیار کیا جائے گا۔

لاہور میں علما سے گفتگو کرتے ہوئے شیعہ علما کونسل پنجاب کے صدر علامہ سید سبطین حیدر سبزواری نے کہا ہے کہ گزشتہ محرم الحرام کے دوران مجالس و جلوس ہائے عزا کیخلاف درج ایف آرز حکمرانوں کے گلے کا پھندا ثابت ہوں گی، ہم مطالبہ کرتے ہیں کہ انہیں واپس لیا جائے، عزاداری سید الشہداؑ رسم نہیں، ہماری عبادت ہے، جس میں کسی قسم کی رکاوٹ کو برداشت نہیں کیا جائے گا۔ انہوں نے کہا کہ نیشنل ایکشن پلان کو تکفیری دہشتگردوں کیخلاف استعمال کیا جائے، اسے عزاداری کے انعقاد اور درودو سلام پڑھنے میں رکاوٹوں کیلئے استعمال نہ کیا جائے۔