امریکہ اسرائیل اور بھارت کے ناپاک عزائم کامیاب نہیں ہونے دیں گے، علامہ مبارک موسوی

شیعہ نیوز ( پاکستانی شیعہ خبر رساں ادارہ) شہدائے پاکستان کے پاک لہو کو کبھی فراموش نہیں ہونے دینگے، ملکی سلامتی و استحکام اور دہشتگردی کے ناسور سے نجات کیلئے قوم متحد ہو کر میداں عمل میں نکلے، بھارت، امریکہ اور اسرائیل ہمارے ازلی دشمن ہیں، ان کے ناپاک عزائم کو ہم ارض پاک میں کامیاب نہیں ہونے دینگے۔

زرائع کے مطابق ان خیالات کا اظہار مجلس وحدت مسلمین پنجاب کے سیکرٹری جنرل علامہ مبارک موسوی نے صوبائی سیکرٹریٹ شادمان لاہور سے 6 ستمبر یومِ دفاعِ پاکستان کی مناسبت سے قوم کے نام جاری ہونے والے اپنے ایک پیغام میں کیا۔علامہ مبارک موسوی کا کہنا تھا کہ 6 ستمبر کے شہداء اور غازیوں نے جس جرات و بہادری سے مادر وطن کا دفاع کیا، آج پھر سے ہمیں اسی قربانی اور جذبے کی ضرورت ہے، جو ملک دشمنوں کے ناپاک عزائم کو خاک میں ملا دے۔علامہ مباری موسوی نے شہدائے پاکستان کو خراج عقیدت پیش کرنے کیلئے صوبائی سیکرٹریٹ میں تقریب کے انعقاد کا بھی اعلان کیا گیا، جس میں شہدائے پاکستان کو خراج عقیدت پیش کیا جائیگا۔

علامہ مبارک موسوی نے مزید کہاکہ پاکستان کے بہادر سپوتوں نے 65ء کی جنگ میں بھارت کو جس ہزیمت سے دوچار کیا وہ تاریخ کا روشن باب ہے، آج بھی ملک کی مسلح افواج وطن کے دفاع کیلئے ہمہ وقت تیار ہیں ، پاک فوج کے سربراہ کی جانب سے بھارتی وزیرِ اعظم مودی کا نام لے کر اسے للکارنا جنرل راحیل شریف کی بہادری کی دلیل ہے ،جبکہ نریندر مودی کے بلوچستان میں مداخلت کے بیان پر وزیراعظم نوازشریف کی خاموشی واضح کرتی ہے کہ حکومت کی ترجیحات کچھ اور ہیں۔