ہندوستان ، سی پیک منصوبے کو ناکام بنانے کی کوشش کر رہا ہے،جنرل شیر افگن
شیعہ نیوز ( پاکستانی شیعہ خبر رساں ادارہ )ہندوستان، سی پیک کو ناکام بنانے کی کوشش کررہا ہے کیونکہ وہ نہیں چاہتا بلوچستان اور پاکستان کے لوگ ترقی کریں، مگر ہم کسی صورت اُن کے عزائم کو کامیاب ہونے نہیں دینگے۔
زرائع کے مطابق ان خیالات کا اظہار آئی جی ایف سی بلوچستان میجر جنرل شیر افگن نے گزشتہ روز کوہلو کے دورے کے دوران ضلعی افسروں، قبائلی عمائدین اور مقامی صحافیوں سے گفتگو کرتے ہوئے کیا۔ ان کا کہنا تھا کہ کوہلو سبی روڈ سے کوہلو، میوند اور بارکھان کے لوگوں کے لئے ترقی کے نئے باب کا سورج طلوع ہوا ہے، جس سے یہاں کے لوگوں کے لئے تعلیم اور ترقی اب ممکن ہوگی جس طرح اس روڈ کو کامیاب بنانے کے لئے یہاں کے لوگوں اور ایف سی نے کوشش کی اسی طرح ہم سب مل کر کوہلو اور کاہان میں باقی رہ جانے والے چند تخریب کاروں کا خاتمہ بھی کریں گے۔ ایف سی بلوچستان میں دہشت گردی کے خاتمے سمیت تعلیم اور صحت کی بہتری کے لئے بھی کوشش کررہی ہے، کیونکہ پڑھے لکھے لوگ جانتے ہیں کہ اُن کا مستقبل پاکستان اور بلوچستان سے وابستہ ہے۔
تقریب کے آخر میں آئی جی ایف سی نے شاہد جہانگیر ایف سی سکول کے بوائز ہاسٹل کا افتتاح بھی کیا، اس موقع پر بریگیڈئر سیکٹر کمانڈ ایسٹ امجد علی ستی، ڈپٹی کمشنر کوہلو آغا نبیل، ڈپٹی کمشنر بارکھان، کمانڈنٹ ایف سی کوہلو امجد محمود، کرنل فیصل، قبائلی رہنما میر نور احمد، میر محبت خان، میر اصغر مری پیردادانی، میر نصیب اللہ مری، میر ہزار خان رمکانی، میر اسماعیل، میر قیوم بجارانی، میر ربنواز زنگ، میر لیاقت و دیگر بھی موجود تھے۔
