عصر حاضر میں درپیش چیلنجز و مسائل کا حل تعلیمات محمد ﷺو و آل محمدؑ میں مضمر ہے، علامہ رمضان توقیر
شیعہ نیوز ( پاکستانی شیعہ خبر رساں ادارہ ) امت مسلمہ کو درپیش مسائل کی بنیادی وجہ تعلیمات محمد (ص) و آل محمد (ع) سے دوری ہے۔ اسلامی دنیا کے بیشتر ممالک پر خائن اور جابر حکمران مسلط ہیں۔ ان حکمرانوں کا طرز عمل اسلام حقیقی کی تعلیمات کے خلاف ہے۔
زرائع کے مطابق ان خیالات کا اظہار شیعہ علماء کونسل کے مرکزی نائب صدر علامہ محمد رمضان توقیر نے جامعۃ النجف کوٹلی امام حسینؑ میں جشن میلاد صادقین کی پروقار تقریب سے خطاب کرتے ہوئے کیا۔ ہفتہ وحدت کی مناسبت سے جشن میلاد صادقین کا انعقاد شیعہ علماء کونسل ڈی آئی خان کے زیراہتمام مدرسے کے مرکزی ہال میں کیا گیا تھا۔ جس میں اہل تشیع و اہل سنت مکاتب سے تعلق رکھنے والے ضلعی رہنماؤں نے شرکت کی۔ جشن میلاد صادقین سے وفاق المدارس شیعہ کے مرکزی سیکرٹری جنرل علامہ افضل حسین حیدری نے خصوصی شرکت کی۔ مقررین نے اپنے خطاب میں فضائل محمدﷺ و آل محمدؑ بیان کئے اور اسلام حقیقی کی تبلیغ و پرچار کی ضرورت پر زور دیا۔
علامہ محمد رمضان توقیر نے مزید کہا کہ پیغمبر اکرم ﷺنے اسلام کی دعوت سے قبل خود کو صادق و امین منوایا، ضرورت اس امر کی ہے کہ اسلامی دنیا کے حکمران بھی اسی کی پیروی کریں۔
