فتح پور درگاہ حملہ، دہشتگرد انسانیت کے دشمن اور خونی درندے ہیں، علامہ ساجد نقوی
شیعہ نیوز (پاکستانی شیعہ خبر رساں ادارہ) اسلامی تحریک کے سربراہ علامہ سید ساجد علی نقوی نے نصیر آباد جھل مگسی کے قریب فتح پور درگاہ میں ہونیوالے خودکش حملہ کی مذمت اور شہادتوں پر گہرے دکھ اور افسوس کا اظہار کیا ہے۔ انہوں نے کہا کہ ہم شہداءکے لواحقین سے دلی ہمدردی اور تعزیت کرتے ہیں اور دکھ کی اس گھڑی میں متاثرین کے غم میں برابر کے شریک ہیں۔ واضح رہے کہ فتح پور درگاہ میں خودکش حملہ میں 20 افراد شہید اور 30 سے زائد زخمی ہوگئے تھے۔
علامہ ساجد نقوی کا کہنا تھا کہ دہشتگرد انسانیت کے دشمن اور خونی درندے ہیں، یہ ملک دشمن عناصر ملک میں بدامنی کا بازار گرم کرنے کی کوشش کر رہے ہیں، جنہیں روکنا ہوگا اور قانون نافذ کرنیوالے اداروں کو عوام کے تحفظ کو یقینی بنانے کیلئے ملک دشمن عناصر کیخلاف فیصلہ کن آپریشن کو مزید تیز کرتے ہوئے ملک میں دہشتگردوں کیخلاف جاری آپریشن کو منطقی انجام تک پہنچانا ہوگا۔
انہوں نے کہاکہ انٹیلی جنس اداروں اور قانون نافذ کرنے والے اداروں کی جانب سے ملک دشمن عناصر اور دہشتگردوں کیخلاف سخت کارروائی کرنا وقت کی اہم ضرورت ہے۔ انہوں نے کہا کہ بلا تفریق تمام مجبوریوں کو بالائے طاق رکھتے ہوئے ملک کو کمزور کرنیوالے بے گناہ عوام کے قاتلوں اور دہشتگردوں کی نشاندہی کرتے ہوئے ان کیخلاف ٹارگٹڈ آپریشن کیا جائے۔ ان کا کہنا تھا کہ دہشتگرد انسانیت کے دشمن اور خونی درندے ہیں جن کا کسی مذہب و مسلک سے تو دور، انسانیت سے بھی دور کا واسطہ نہیں۔ معصوم لوگوں کا خون بہانے والے کسی رعایت کے مستحق نہیں۔ جاں بحق افراد کے لواحقین سے تعزیت اور شہداء کے بلندی درجات کی دعا کرتے ہوئے علامہ ساجد نقوی نے مطالبہ کیا کہ دہشتگردوں کے سہولت کاروں کیخلاف بھی کارروائی کی جائے، تاکہ دہشتگردی کا جڑ سے خاتمہ کیا جا سکے۔
