حکومت اسرائیل کیساتھ تعلقات قائم کرنے کا فیصلہ کرنے جارہی ہے، صاحبزادہ ابوالخیر

شیعہ نیوز (پاکستانی شیعہ خبر رساں ادارہ)  جمعیت علماء پاکستان و ملی یکجہتی کونسل کے صدر ڈاکٹر صاحبزادہ ابوالخیر محمد زبیر نے انکشاف کیا ہے کہ حکومت بیرونی دباؤ میں اسرائیل کیساتھ تعلقات قائم کرنے کا فیصلہ کرنے جارہی ہے۔

 صاحبزادہ ابوالخیر محمد زبیر نے وزیر خارجہ شاہ محمود قریشی کے اسرائیل سے مشروط تعلقات قائم کرنے کے بیان کی پرزور الفاظ میں مذمت کرتے ہوئے کہا ہے کہ اس بیان سے حکومت کے عزائم کھل کر سامنے آگئے ہیں اور یہ بات واضح ہوگئی ہے کہ حکومت نے بیرونی دباؤ پر جس طرح اس سے قبل چند فیصلے کئے ہیں اسی طرح بیرونی دباؤ پر اسرائیل کیساتھ تعلقات قائم کرنے کا فیصلہ بھی کرنے جارہی ہے، جو فلسطین کے بارے میں بانی پاکستان کی سوچ اور ان کے قائم کردہ اصولوں کے سراسر منافی ہے، اس اقدام سے نہ صرف آزادی فلسطین کی جدوجہد کو سخت نقصان پہنچے گابلکہ آزادی کشمیر کی جدوجہد بھی متاثر ہوگی۔

انہوں نے کہا کہ اس سے قبل حکومت کے ایک ممبر نے پارلیمنٹ میں اسرائیل کے حق میں بیان دیا تھا، اب یہ بات واضح ہوگئی ہے کہ یہ سب کچھ ایک پلاننگ کے تحت کیا جارہا ہے اور آہستہ آہستہ اسرائیل کو تسلیم کرنے کی راہ ہموار کی جارہی ہے، جو پاکستان کے غیور مسلمانوں کو کسی صورت قبول نہیں۔