علامہ مرتضیٰ حسین صدر الفاضل کی 28ویں برسی عقیدت و احترام سے منائی گئی

شیعہ نیوز (پاکستانی شیعہ خبررساںا دارہ) امامیہ اسٹوڈنٹس آرگنائزیشن پاکستان کی مجلس مشاورت کے بانی رکن مولانا مرتضیٰ حسین صدر الفاضل کی 28ویں برسی لاہور میں انتہائی عقیدت و احترام کے ساتھ منائی گئی۔ برسی میں آئی ایس او کے مرکزی صدر تہور حیدری نے بھی خصوصی شرکت کی۔ برسی کی تقریب سے علامہ قمر عباس مجاہد نے خطاب کرتے ہوئے کہا کہ مولانا صدر الفاضل کی ملت تشیع کیلئے خدمات ناقابل فراموش ہیں، مولانا کی 325 سے زائد تالیفات ہمارے لئے بہترین اثاثہ ہیں، جن سے آئندہ نسلیں بھی مستفید ہوتی رہیں گی۔ اس موقع پر مرکزی صدر آئی ایس او پاکستان تہور حیدری کا کہنا تھا کہ مولانا مرحوم ایک تاریخ ساز شخصیت تھے، آپ نے پاکستان میں بہت سے تحقیقی، علمی اور رفاہی اداروں کی تاسیس اور تنظیم سازی کی، جن میں آئی ایس او پاکستان بھی شامل ہے، مرحوم کی ملت بالخصوص آئی ایس او کیلئے خدمات ہمیشہ یاد رکھی جائیں گی۔ برسی کی تقریب میں سابق مرکزی صدر آئی ایس او اطہر عمران طاہر اور انچارج سابقین ڈیسک نثار ترمذی نے بھی شرکت کی۔ یاد رہے کہ مرحوم دنیائے اسلام کی مختلف الجہات شخصیت تھے، جو بہ یک وقت فقیہہ، مسند، محدث، عظیم مفسر اور باکمال ادیب تھے۔