لاہور، سی ٹی ڈی کی کارروائی، داعش کے3 دہشت گرد گرفتار

شیعہ نیوز (پاکستانی شیعہ خبر رساں ادارہ) کاؤنٹر ٹیررازم ڈیپارٹمنٹ نے داعش سے تعلق رکھنے والے 3 مبینہ دہشتگرد گرفتار کرلئے، ملزمان سے بارودی مواد اور دیگر سامان برآمد۔ سی ٹی ڈی ذرائع کا کہنا ہے ملزم سرکاری اداروں پر حملوں کی منصوبہ بندی کر رہے تھے۔ کاؤنٹر ٹیررازم ڈیپارٹمنٹ نے دعویٰ کیا ہے کہ مغلپورہ میں چھاپے کے دوران کالعدم شدت پسند تنظیم داعش سے تعلق رکھنے والے 3 دہشتگردوں کو گرفتار کیا گیا ہے۔ گرفتار ملزمان میں مظفر علی خان، اسد آفتاب اور ملک خضر حیات شامل ہیں اور ان کا تعلق داعش کے ذیلی دارے صوت الامہ سے بتایا جا رہا ہے۔ سی ٹی ڈی حکام کا یہ بھی کہنا ہے کہ گرفتار دہشتگرد شہر کے سرکاری اداروں پر حملوں کی منصوبہ بندی کر رہے تھے۔ ملزمان کے قبضے سے بھاری مقدار میں بارودی مواد اور دیگر سامان بھی برآمد ہوا ہے۔ تھانہ سی ٹی ڈی میں مقدمہ درج کر لیا گیا ہے، جبکہ ملزمان کو مزید تفتیش کے لیے نامعلوم مقام پر منتقل کر دیا گیا ہے۔