شام میں 4 امریکی فوجیوں سمیت متعدد افراد ہلاک

خودکش بیلٹ میں ملبوس حملہ آور نے منبج میں امریکی فوجی مرکز کے قریب ایک مصروف ریسٹورنٹ میں داخل ہوکر دھماکا کیا، دھماکے کے وقت ریسٹورنٹ میں امریکی فوجیوں سمیت شام کی اپوزیشن فورسز کے جنگجوؤں کی بڑی تعداد موجود تھی۔

دھماکے میں متعدد امریکی فوجیوں سمیت 20 افراد زخمی بھی ہوئے جس کے باعث ہلاکتوں میں اضافے کا خدشہ ظاہر کیا جا رہا ہے۔ داعش نے حملے کی ذمہ داری قبول کرلی ہے۔

ٹوئٹر پر جاری بیان میں امریکی سربراہی میں بننے والے اتحاد کے ترجمان نے خودکش حملے میں فوجیوں کی ہلاکت کی تصدیق کی ہے ۔

ترک خبر رساں ادارے کے مطابق زخمی فوجیوں کو ہیلی کاپٹر کے ذریعے اسپتال منتقل کیا گیا ہے۔

امریکی صدر ڈونلڈ ٹرمپ کی جانب سے فوجیوں کے انخلا کے اعلان کے بعد امریکی فوج پر یہ پہلا حملہ ہے ۔