کراچی میں کالعدم تنظیم کے 2 دہشتگرد گرفتار، غیر ملکی کرنسی اور اسلحہ برآمد

شیعہ نیوز (پاکستانی شیعہ خبر رساں ادارہ) شہر قائد میں سپر ہائی وے کے قریب جنجال گوٹھ میں کراچی پولیس نے کارروائی کرتے ہوئے کالعدم دہشتگرد تنظیم کے 2 دہشتگردوں کو گرفتار کرکے ان کے قبضے سے ملکی و غیر ملکی کرنسی اور اسلحہ برآمد کرلیا ہے۔ تفصیلات کے مطابق کراچی پولیس نے سپر ہائی وے کے قریب واقع جنجال گوٹھ میں کارروائی کرتے ہوئے 2 دہشتگردوں کو حراست میں لے لیا ہے، دونوں دہشتگردوں کے قبضے سے لاکھوں روپے مالیت کی ملکی و غیر ملکی کرنسی اور اسلحہ برآمد ہوا ہے۔ پولیس کا کہنا ہے کہ گرفتار دہشتگردوں کی شناخت عظیم محسود اور داؤد منور محسود کے نام سے ہوئی ہے، دونوں دہشتگرد کراچی میں بینک ڈکتیاں کرکے پیسے وزیرستان بھجوانے کے علاوہ کئی پولیس اور رینجرز کی ٹارگٹ کلنگ میں بھی ملوث ہیں، جبکہ داؤد محسود ڈی ایس پی چوہدری اسلم کے گھر پر حملے کا ماسٹر مائنڈ ہے۔