ترک صدر طیب اردغان 2 روزہ دورے پر پاکستان پہنچ گئے
شیعہ نیوز (پاکستانی شیعہ خبر رساں ادارہ) ترک صدر رجب طیب اردغان 2 روزہ دورے پر پاکستان پہنچے ہیں، ترک صدر کے طیارے نے نور خان ایئر بیس پر لینڈ کیا جہاں وزیراعظم عمران خان نے اپنی کابینہ کے ہمراہ مہمان صدر، ان کی اہلیہ اور وفد کا استقبال کیا۔
نور خان ایئر بیس سے ترک صدر کو وزیراعظم ہاؤس لے جایا جائے گا جہاں انہیں گارڈ آف آنر پیش کیا گیا، اس موقع پر دونوں ممالک کے ترانے بھی بجائے گئے، وزیراعظم عمران خان ترک صدر کے اعزاز میں عشائیہ بھی دیں گے جبکہ ترک صدر طیب اردغان اور وزیراعظم عمران خان ون آن ون ملاقات بھی کریں گے اور دونوں ممالک کے درمیان وفود کی سطح پر مذاکرات بھی ہوں گے۔
ترک صدر طیب اردغان اور وزیراعظم عمران خان ملاقات کے بعد مشترکہ پریس کانفرنس سے خطاب کریں گے جبکہ پاکستان اور ترکی کے درمیان کئی معاہدوں اور مفاہمت کی یادداشتوں پر دستخط بھی ہوں گے۔ ترک صدر کل صبح 11 بجے پارلیمنٹ کے مشترکہ اجلاس سے خطاب کریں گے، ایوان صدر میں ترک صدر اور ان کے وفد کے اعزاز میں ضیافت کا انعقاد کیا جائے گا، ایوان صدر پہنچنے پر صدر مملکت عارف علوی ترک ہم منصب کا استقبال کریں گے جبکہ ترک صدر جمعہ کی نماز فیصل مسجد میں ادا کریں گے۔ بعد ازاں ترک صدر رجب طیب اردغان کل رات 8 بجے نورخان ایئر بیس سے واپس روانہ ہو جائیں گے، وزیراعظم عمران خان ترک صدر کو رخصت کریں گے۔
