ملک میں قانون کی نہیں طاقت کی حکمرانی رہی، وزیراعظم

شیعہ نیوز:وزیراعظم عمران خان نے بہاولپور میں کسان کنونشن سے خطاب کرتے ہوئے کہا کہ ملک میں قانون کی نہیں طاقت کی حکمرانی رہی، طاقتور ملک میں بڑا نفع کما رہا تھا، طاقت وروں کی ملک میں شوگر ملز ہیں، شوگر ملز مالکان کاشتکاروں کو اصل قیمت نہیں دیتے تھے، ہمارے دور میں کسانوں کو گنے کی پوری قیمت ملی، ہمارا مقصد کسانوں کی آمدن کو دگنا کرنا ہے۔

وزیراعظم نے کہا کہ اس سال ملکی تاریخ کی سب سے زیادہ موٹرسائیکل فروخت ہوئیں، پھر بھی لوگ کہتے ہیں ملک تباہ ہوگیا، کیسے تباہ ہوگیا جب موٹرسائیکل کے اور ٹویوٹا کی گاڑیوں کے ریکارڈ ٹوٹ گئے اور کبھی اتنی زیادہ گاڑیاں نہیں بکیں، موٹرسائیکل اس لیے بکے کیونکہ دیہات میں پیسہ فراہم کیا گیا، سب سے زیادہ موٹرسائیکل وہیں بکے، ہم پہلے دو سال ملک کو سنبھالتے رہے ، اب آہستہ آہستہ ملک اوپر جانا شروع ہوگیا ہے، لیکن مسئلہ کرنٹ اکاؤنٹ خسارہ ہے۔عمران خان نے مزید کہا کہ ملکی آبادی ساڑھے 22کروڑ ہو چکی ہے، لیکن آبادی کے تناسب سے پیداوار میں اضافہ نہیں ہوا، اس سال ہم نے ملکی تاریخ میں سب سے زیادہ اناج درآمد کیا، کپاس جو کبھی ہم برآمد کرتے تھے، اب درآمد کرنی پڑی، جب تک کسانوں کی مدد نہیں کریں گے، تجارتی توازن بگڑا رہے گا۔